1:30 مساءً الأربعاء 12 ديسمبر، 2018

تعويد الطفل على النوم بمفرده


صوره تعويد الطفل على النوم بمفرده

 

الهدف



تعويد طفلتى سنه وشهرين على النوم بمفردها في غرفتها بدون هدهده ولا طبطبه ولا صدر ماما

السبب

ان ماما اللى هى انا يعنى .

.

تعبت خلااااااااااص
اولا عشان تنام على الاقل ساعة عياط وزهقنه واحنا كمان في الحر
كنت بعمل اراجوز
شويه على المورجيحه
وشويه طبطبه وحنان ….

وشويه اغاني ودلع وكل اللى بتفكروا فيه كنت بعمله على امل انها تنام

وسعات بقى بعد كل ده تنام لها ربع ساعة وتصحى تزعق …..

ومعقول كده تنام لوحدها ………..

ازاى ,



والخدامه فين
لازم اصحى واطبطبي ومعلش يا حبيبتى ومعلش يا ضنايا وحقك عليا

ويا سلام بقى لو انا نايمه جنبها على جنبى مثلا وعاوزه اتقلب ……… مش مسموح طبعا اصل لو اتقلبت هتصحى وهترجع تعوز ترضع وبرده هتنامى على جنبك

متى اعرف ان ابنى مستعد لهذه الخطوه



ببساطه لو ابنك متعلق بيكى نصف نصف
يعنى لو هو اقل من 6 شهور يبقى بلاش منها لانه محتاجك جدا جدا
ولو هو انطوائى … يعنى زى ماكنت بنتى كده محدش بيشيلها ما بتخرجوش كتير
ولو خرجتم هى دايما على ايدك انتى يبقى برده مش مستعده
يبقى الاول تعوديها الاول على الخروج مع غيرك
وانها تفضل شويه بعيد عنك وبعد كده بقى تبقى تعملى الموضوع ده

القرار

فضلت افكر ……….

انا هفضل كده لحد امتى 3 سنين .

.

مستحييييييييل
ده غير ان الدكتور ياسر نصر حبيب قلبى قال لازم الطفل يتعود النوم بمفرده ضرووورى قبل سنتين
قلت بقى ما بدهاش عياط بعياط بقى اتوكلى على الله
قرات الموضوع ده واتوكلت على الله

خطوات التنفيذ

اليوم



اختارت يوم الجمعة لان جوزى بيبقى في البيت وهو الصراحه متفهم جدا قلت اهو حد يشجعنى
لان ماشاء الله حماتى وامى جيت بس بقولهم قالو لى انتى عاوزه تبقى ام مودرن وبسهولة ….

المكان



شفتى المتواضعه
احنا عندنا اوضه اطفال فيها سريرين مفروض انى كنت انام على واحد وهى على واحد بس هى الصراحه ما بتهننيش خالص
فكنت بنام جنبها على نفس السرير وجوزى كان بيخلع مننا ويروح الاوضه التانيه
المهم انا مؤخرا حطيت ناموسيه على السرير لان عندنا ناموس كتييييييييييييير
فهى طبعا نايمه على السرير اللى فيه الناموسيه

الميعاد



الطفل عامة من 12 الى 18 شهر بيحتاج 14 ساعة يوميا
قيلولتين و11 ساعة بالليل ……..

ده المفروض يعنى
هى عامة بتاخد لها قيلوله واحده دى المضمونه وهى تقريبا الساعة 11 او 12 الظهر
قلت اتوكل على الله وابدا بالوقت ده

التجهيزات



مهم جدا تاخدى بالك انه لما هينام مفيش حاجة هتصحيه
يعنى حفاضه نظيفه
الدنيا مش حر عنده
مفيش ناموسه ولا ذبابه وياريت لومفيش صوت عالى
تعملى حسابك انك ماتعمليش اي صوت في الشقه لا تليفزين ولا حتى صوت خطواتك تسمعه لانها سبحان الله
بتحس بكل ده وتكون يا حبيبتى زى اللى منتظراكى تروحى واحنا طبعا مش عاوزين نعذبها

ماقبل النوم



لااااااازم تاكليها طبعا كويس
اى اكل طبعا وياريت يكون بيحتوى على العناصر الغذائية يعنى بلاش رز وشوربه ,



ورز على لبن ,



وفته شاى
لو عندك لبن شربيه لها كده وهاتى لها جنبه تفاحه ولا شويه عنب او حتى طماطمايه
الشاى بلاش الاحمر اعملى لها شاى اخضر وحطيه في التلاجه وشربيه لها عشان فيه مضادات للاكسده كتيير هتحبه جامد
وبلاش الله يكرمك اي حاجة من المحلات انت الحمد لله بصحتك واتمشي كده لحد المطبخ
واعملى لها اكل

لازم تحميها طبعا او تغسلى لها كويس لو انتى مش عاوزه تحميها ولو ان الخطوه دى هتفرق معاكى جدا

اول قيلوله

خلاص استحمت واكلت الحمد لله
حطيها بقى على السرير ……………
وما ادراكى
عياط عياط عياط
سبتها 5 دقايق ورحت لها دقيقه
خمس دقايق واروح لها دقيقه

لحد يا حبيبتى على ما عدت ساعة الا ربع كانت خلاص هبطت من العياط وبدات تحط راسها على السرير
واول ما تحط راسها على السرير معدتيش تروحى ناحيتها خلاص كده لان لو رحتى هتبدا من الاول تانى

خلاص كده نامت الحمد لله
كل شويه تعيط كده ثوان بس بترجع تنام تانى
ما تروحيش لها ابدا في الثوان دول

لحد ما هتنام ان شاء الله لكن هيبقى كله نوم مكسر مش عميق اول مره بس

اين اذهب وابنتى تبكى



انا الصراحه مكنتش صليت الظهر اتوضيت وصليت وفضلت ادعى ربنا يهديها لى
جوزى هدانى شويه بعدها مشي وانا رحت قعدت على النت بس فضلت ادعى لها

اول يوم بالليل



احنا خرجنا ومشت كتيييييييير جدا وجت هبطانه جدا
وده كان مصلحه
اكلتها وحمتها وعلى السرير
هما خمس دقايق بس والحمد لله نامت
من غير صويت من غير طبطبه ولا اي حاجه
ودى كانت اول ليلة اعرف انام فيها

طبعا لازم تقومى مره بالليل ترضعيها او تاكليها لانها هتجوع بالليل
رضعيها وهى نايمه من غير ما تفوق وان شاء الله هتبقى زى الفل

تانى يوم القيلوله



احنا خرجنا الصراحه ودى كانت غلطه منى كان مفروض
على الاقل 3 ايام على ما تهضم الموضوع لكن الحمد لله عدت على خير

تانى يوم بالليل



مجرد ما حطيتها على السرير اخدت دقيقة كده بكاء بعدها الحمد لله نامت الكلام ده النهارده بالمناسبه

الاخطاء



اول غلطه انى بدات مره اعمل الحوار ده وهى عندها 7 شهور لكن للاسف كانت انطواءيه جدا جدا
فضلت تعيط يا حبيبتى كتييييير جدا وماردتش تسكت خالص
عرفت ساعهتها ان ده مش الوقت المناسب خالص

اول مره لما بدات تنام من التعب صعبت عليا قمت رايحه لها وقلت ايه ده اكيد عندها ناموس
ده اكبر غلط لانها بدات عياط من الاول بعد ما كانت نامت عند ساعة وتلت كملت ساعة وربع

ملحوظه مهمه جدا
ماتعذبيش ابنك معاكى
يعنى مجرد ما تبداى مفيش مجال ترجعى
وطالما انتى عودتيها على النوم لوحدها ما ترجعيش بقى تطبطبي وتنيمى على البزازه والحوار ده خالص
ويستحسن تنتقلى من اوضتها وترجعى تنامى جنب جوزك الغلبان
ولو ان النومه جنب الرجاله دول برضه ما بيرحيوش بس ما علينا

اى استفسار انا في الخدمه وادعوا لى ربنا يرزقنا جميعا الفردوس الاعلى

342 views

تعويد الطفل على النوم بمفرده