1:09 مساءً الخميس 21 فبراير، 2019


قصيدة المكالمة كلمات

بالصور قصيدة المكالمة كلمات d7a5902da987e315b439f02d008ea457

كلمات قصيده المكالمه كامله لهشام الجخ

.

خلاص عرفت

عملوا ثوره و شالوا زفت

بس ما تقوليش خلاص مشوا حمارك

اي واحد بعده هنخليه حمارنا ..

حتي لو ما كانش اسمه ” .. حمارك ”

شعب مين يا جحش انت

هى مصر امتي حكمها شعب ..

مصر بتسلم و دانها لاي كلب ..

بس يتزوق شويه

شرعيه

ديموقراطية

ليبرالية

عسكرية

اي كلمه فيها ” ايه ”

اي كلمه تكون ” طريه ”

الشباب المصري منظر ..

كله فاكر نفسه عنتر ..

انفخوهم انتوا بس و عظموهم

فهموهم ان رايه ده امانه ..

و ان اي كلام يخالف رايه اوبا .. يبقي بدات الخيانه ..

وافردوا اديكم شويه بالفلوس .. الناس جعانه .

فنانين .. فنانين و مثقفين دول عند خالتك ..

دول شحاتين

يابني كله قصاد فلوسك ..

راح يبوسك ..

فيه ولد شاعر كويس ..

شوفته مره بيشتم الريس ..

طلعوا الولد ده في الاعلام كتير

اشتروه حتى لو كان سعره غالي ..

هاتوا رجله واحده واحده و بالطريقه ..

و اكسروا عينه و داغه..

بس اوعوا يحس بينا ..

خلوه كده مصدق دماغه

اديه فلوس .. ادوه كتير

واحده واحده هيبقي واحد م الحمير

و الحمير و اقفين طابور ..

و احنا ما لناش اي دور ..

احنا بس يادوب بنديهم فلوس

بس احنا مش على المسرح يابابا ..

احنا فين .. في الكالوس

هما هيادوا الوظيفه فرد فرد ..

احنا هنجيب الديكور و نظبط اضاءه .. يبقي عرض .

هما ثوره و هما شعب .. ياكلوا بعض ..

اما احنا ..

احنا نسمه .. احنا بلسم ..

وحلني على بال ما حد يفوق و يفهم ..

____

– ليه يا شيخنا ..

طب هنعمل ايه يا شيخنا ..

طول ما هو الاعلام سالخنا

و احنا برضو يعني لسه مسيطرين

طول ما الناس جعانه و مطحونين

الجوع جهاله .. و الجهل جوع ..

و الجوامع تحت ايدنا في البلاد و في النجوع ..

هي الناس هتفهم ” ليبراليه ” و ما ركسية” ..

الناس هتفهم ” اسلاميه ” ..

الغلابه في القري ما لهمش خلق للحوار ..

دول ناس غلابه

يا اما ” جنه ” يا اما ” نار ” ..

و احنا طبعا طرح جنه ..

هي الناس هتاخد دينها عنهم و لا عنا ..

احنا اللي بنقول الحرام و احنا اللي بنقول الحلال

احنا اللي هنسوقهم يمين و احنا اللي هنسوقهم شمال

الفنانين ..

ان كان ممثل و لا مطرب و لا شاعر

اللي يناصرنا هنمدحه بالخيرو نذكر اسمه على المنابر

و اللي يعادينا ياكش ما يكون شيخ بعمه هنقول ده فاجر .. و لا كافر

و الناس بتمشي و را الخطب ..

و الجهل ناره قايده قايده

احنا بس يا دوب هنرميله الحطب ..

___________

– تمام يا فندم ..

كل متظبط و متشيك و متهندم يا فندم ..

هو بعد الناس ما شافت حد ليه و ش يتكلم يا فندم ..

طبعا الاعلام بتاعنا وطني حر ..

احنا بس خايفين نفتح الخيط للعيال لا الخير يكر ..

دي سحابه صيف يا فندم هتاخد وقتها و على طول تمر ..

الرموز الاعلاميه ..

الصراحه ميه ميه ..

و هي دي الديموقراطيه ..

احنا ما معناش مذيع يطلع على القنوات و ينقد و نشتم ..

احنا بنقفل القنوات يا فندم

الشعب منحاز لينا طبعا ..

بالتمام ..

فنانين و و مثقفين و مطربين .. مفيش كلام ..

ايوه طبعا غنوا لينا

ايوه غنوا لمصر طبعا يبقي طبعا غنوا لينا

قالو ايه قالو

” مصر يا اما يا سفينه ..

مصر عايشه في بحر هايج و احنا ربان السفينه ..

تسلم .. .. تسلم الايد اللي ربت تسلم الكيكه العجينه ”

احنا مش فاضيين يا فندم للاغاني و للكلام ..

الكلاب هى اللي فاضيه للنباح

اما احنا بتوع سلاح

________

” الشعر مصلوب على و تر الوريد ..

كفراشه دامت بكل محاجر العهر استفاقت ..

نمله تشتم منساه الرسول و ترفع الاحلام شعبا لا يريد ..

وجع على الابواب يكسر نابه ..

قل للسراب متى سيفتح بابه ..

ف انا مللت من الحكايا كل ليل دون ان ياتي جديد ..

النيل اهات ورمز للجياع ..

خذ كل ما ياتي لتهداه الضباع ..

و اركض على الاسفلت و اقتل طفله لا يعرف العشاق معنى عشقهم الا باوقات الوداع ..

الشعر مصلوب على و تر الوريد ..

و انا على المرسي الطويل ..

كماء بحر من حديد .. ”

و انا مياه من نيلك يا بلدي ..

و انا مياه من طينك يا بلدي ..

انا مش معهم كلهم

ولانيش تبعهم كلهم

لساني فاكر مشيه الكورنيش و ايدك ..

وحشني رمضانك و الفطور على صوت ادان رفعت و عيدك ..

وسط البلد وحشتني من غير الحواجز و الحجاره

انا كنت زمان بمشي ما كنتش اعرف ان في الشارع و زاره

كنت بتحامي بعينيكي و بايد حبيبتي و بالسيجاره

كنت بدفي اما بركب ميكروباص ..

عملت كل حاجه تزعلك لكني ما ضربتش رصاص ..

وسط البلد نسيت صوابعي اللي اتهروا ..

نسيت سجايري الفرط و هدومي اللي دابوا و اتبروا ..

يا عم يا بتاع الخطب يا عم يابتاع السلاح

هو احنا يعني يا اما نبقي سداح بداح

يا اما تطغوا و تفتروا ..

بزياده لينا 3 سنين بتبيعوا فينا و تشتروا ..

احنا البلد ..

احنا السند و المستند ..

احنا اللي قبل ما تبني سدك كنا سند ..

و احنا اللي علشان القنال كانت ضهورنا بتتجلد ..

احنا البلد ..

ملعون ابو اللي ما داقش جوعي

و ان كنت مش هصعب عليه و الله ما هوريه دموعي

انا اقوي منكم ..

انا جدر ضارب في البلد دي غصب عنكم ..

يا عم يابتاع السلاح . يا عم يا بتاع الخطب

تركتكوا اصلا نخل شاخ و لا عادش بينزل رطب

انا مش طرف في خناقه الحكم اللي قفلت قلبكم ..

انا قلبي مؤمن ان ملك الله بيهبه لمن يهب

بس اوعي تفتكر اني هرضي بجوع عيالي ..

او اني اشوف بلدي قصادي بتتنهب

و الله معمولك عمل ..

شعب اتنحس على نحس همي

شعب اتوقف على حرق دمي

ادب ايدي في غيط شعور ..

عشمان انول بدر البدور ..

يطلعلي شال امي

لو حد زعلان اني ثورت ..

اديني غورت ..

بطلت ثوره و بطلت نيلة

و شلت على راسي التقيلة

ملناش يا عم نصيب نفرح بخلفتنا ..

ما يترضي بالمكتوب يا ترضي بالفتنه ..

يا دوب شافوني عريس

نصبوا الطريق متاريس

وحاصروا زفتنا ..

هنداري ليه و نلف و ندارى في الالاعيب ..

الاعتراف مش عيب ..

لو كنا شوفنا الغيب ..

لا كنا قندلنا و لا كنا زفتنا

صعبان عليا الحلم ..

شايفه بيتكسر ..

و عينيا طايله المدى

بس الايدين اقصر ..

انا اللي عمره ما غاب

و عمره ما اتاخر ..

تطرح عينيكي عذاب

يزرع عينيه سكر ..

انا اللي قال حاضر

لا شرط و لا اتامر ..

ولا طمع و لا اتدانى

ولا بطش و لا اتجبر ..

انا اللى كل ما اجوع

ببعينيكي بتصبر ..

ما يغركيش العدد

و الله انا اكتر ..

انا اللي مش اخوان

و انا اللي مش عسكر

 

 

  • قصيدة المكالمه كامله
  • قصيدة المكالمه كلمات
300 views

قصيدة المكالمة كلمات