سنعرض لكم في هذا المقال مجموعة من الاشعار العراقية التي قيلت في الحب؛ فمنها ما
قاله الشاعر عبد الحسين الحلفي، واخرى للشاعرة شهد الشمري وغيرها الكثير.
احبك مو لان انت حلو- عبد الحسين الحلفي
احبك مو لان انت حلو لا
لان روحي التقت كبلي ولك بيك
اذا انت تمر ع الاعمى يصيح الله
والاخرس لون حاچيته يحاچيك
اذب كلبي على سهمك وانه مجروح
واكلك دير بالك اخاف ااذيك
اجرحني ولك بس كون عالكيف
لان انت ويه دمي وخاف ابديك
اجرحني ولك بس كون ما موت
حتى من يتهمونك ابريك
على المراية وكفت ما شفت وجهي
وشفت وجهك طلعلي وكمت احاچيك
وثبت بمرايتي وجهك مرايات
واباوع وجهها مرايتي بيك
بكذلتك شد ركبتي وطلع الروح
اريدنها بعد تتكرب عليك
انت بحضني واكول بعيد
اريدن هيچ كون انه انخبط بيك
بيا شارع مشيت كبالي الاكيك
افوت بغير شارع هم الاكيك
ارد للبيت كبلي الكاك بالباب
اطب كبلي تطب وتكلي اتانيك
بغيرك فكرت كلت انه انساك
طلع غيرك يشبهك وفكرت بيك
طلع غيرك يشبهك وفكرت بيك
محتاجة كلش الك – شهد الشمري
محتاجة كلش الك يلي شاغل انت الفكر
محتاجة الك مو حجي وارتاح من ينذكر
هنياله من كابلك يا احلى صورة شعر
محتاجة الك ما تجي ما باقي شي بالعمر
زعلان؟ ليش الزعل زعلان انه اعتذر
بس ارجع لخاطري صير على نحري
عطر
صير على جفني كحل
حليني بين السمر تعبني ذرف الدمع
بس ما طفالي الجمر بركان في داخلي
ويا خوفي لا ينفجر شو ماخرك ما تجي
ما ظل الك كل عذر
اهلال جرحك كمل اي كمل واصبح بدر
صدكني حيل اتعبت حبك عسر مو يسر
اترجيت وتوسلت بيك شكثر وشكثر
ما فاد بيك الرجه وجبرتني لهل امر
ما بعد اضلن شهد خليك مني حذر
واحجيها لا تستحي كول انت طبعك
غدر
حبك تحية صبح ما تلفض بالعصر
روح وبعد لا ترد شي عادي صار الهجر
اللي ما عرف معنى العشك ما بعد احطله كدر
جانت درجتك الف بس هسه صارت صفر
احبك
انا بس بالكلام وذايب بحبك
وافكر بيك انا في ليلي ونهاري
اذا شفتك صدك شو يصير انا بحالي
اظن يغمى علي وافقد ابصاري
تعال وصير الي بالحب غطا وفراش
ودفيني بحنانك واعرف اسراري
احبك كالطفل من يهوى صدر امه
يموت من القهر لو فطمته اجباري
زرعتك بالعشق وردة وصرتلك ماي
غصن حبك شرب من اعذب انهاري
انا بدونك مثل بيت انهدم ساسه
تعال ابني اساسي وابدا اعماري
حبيبي ارحم بحالي حن على قلبي
انا بهجرك دمع بعيوني ضل جاري
صرت انت بقلبي كالنبض والدم
وسميتك حبيبي ملهم افكاري
تعال وخلي ايدك تشبك ايدي
واحضني وطفي بالعشق ناري
وخلي شفتي تشرب مي شفافك
اريد بشفتك ترتوي ازهاري
اريدك كالحمامة تحط على بيتي
واريدك كالثريا تنور بداري
تعال وصير الي انت الهوا والماي
واريدك كالبلابل تسكن اشجاري
تعب قلمي وانا اكتبلك قصائد حب
ولكن للاسف ما تفهم اشعاري
يا قمر
بهيدة على بختك يا كمر، مساهر واريد اشكيلك
انه غريب ابدنيتي مضيع وادور ابليلك
عن ربعة اهلي ، ودلة الديوان ، ومواويلك
عن ضحكة البربين لعيون الدلو
عن رقصة الصفصاف والماي الحلو
عن صحبتي، وخلاني، وعيون النهر
بهيدة على بختك يا كمر
يا غربتي
غربة عصافير التودع عشوشها برفة جنح
ويا دمعتي
دمعة الكاع اللي تبكي موت اهروشها بجيت الملح
يا دار اهلنا الطاهرة مر العمر
عيون الحب امساهرة وما مش خبر
بهيدة على بختك يا كمر
وك يا كمرنة مروتك حني الشواطي بدمعتي
كلهم كبرت اعله الصبر والونه صارت غنوتي
مشتاق ابوسن دجلة واشرب مايها
واعزف ترانيم المحبة بنايها
دجلة الهوى، والسوق، والحب، والسهر
بهيدة على بختك ياكمر
