قالوا علامك صامت وقلت ياناس
كثر الكلام يقل لاجله مقامي
الصمت والحكي مصدر افلاس
ولقيت في صمتي يزيد احترامي
الصمت له معنى وله ذوق واحساس
مركب نجاتك في بحور الظلامي
ترى الرجل صوره من الراس للساس
ثم يتبين جوهره بالكلامي
اما نطق في كلمة ترفع الراس
تضفي على شكله جديد الاسامي
والا يعود معدنه معدن نحاس
يرميه سهمه بعد ماكان رامي
لا صار عندك من ثمينات الالماس
خله بصدرك لين وقت التمامي
اخاف يطلعلك من الناس بلاس
والا سفيه ما يرد السلامي
الله خلق خلقه على عدة اجناس
وكلن يسوقه مذهبه للامامي
والله خلق بالطير قمري وقرناس
ووقت الهدد ما ينغزي بالحمامي
لا جال في صدرك من الهم هوجاس
وعينك يحاربها لذيذ المنامي
ونفسك عليله والفكر صار محتاس
اترك طمان القاع وارق السنامي
عليك بالعالي ليا هب نسناس
يبري الجروح الخافيه والعظامي
وخلك لربعك دايم الدوم نبراس
وخص القريب وخص ولد العمامي
خلك لهم في داجي الليل مقباس
ولصاحب اصدق من حقوق الغمامي
ربعك ذراك ليا لحق راسك الباس
قدم لهم شربك ولو كنت ضامي
وخلك لثوب الطيب والعز لباس
واترك دروب تنتهي بالحرامي
وفعل الجميل وواجب الضيف نوماس
ومن لا نفع بالضيق نفعه عدامي
بيت الكريم ابوابه بدون حراس
وبيت البخيل يعد مثل الهدامي
كل بها الدنيا نصيبه بمقياس
ياخذ نصيبه لوجفوه الانامي
