ابي ابكي من الضيقة وابعزف للهموم الحان
ابي اطلق مواويل الحزن وبطرح كل دواويني
ابي اشكي ابي احكي ابوصف للبشر حرمان
ابيهم كلهم يدرون ابيهم يشعروا فيني
ابي لا من طرى اسمي بكى من لوعتي شيبان
ابي لامن طرى”عاشق” ذكر من كان يغليني
ابيهم يذكرون اني صرت بدمعتي غرقان
ابيهم يعرفون الهم هواللي صار يخاويني
ابي اصرخ وابلغهم واقول ان الفرح خوان
يجي مرة معاي و هو طول العمر ناسيني
ابي اترك لهم قصة واخيرهم على العنوان
يسموا “حزن “يحطوا “دمع” ..ما عاد يعنيني
ابي لامن وصل صوتي يحس بضيقتي انسان
ابي لامن نزف جرحي لقيت اللي يداويني
ابي شخص يجي يمي و يقفل للعنا بيبان
ابيه يكون لي خل وعلى حزني يواسيني
ابيه لمركبي مرسى وابيه لغربتي اوطان
ابي لامن ذرفت الدمع لقيته لي يعزيني
انا ما ابيه يصبح ضلع ابيه يكون لي ضلعان
ابي لا من مشيت وطحت يحط يديه في يديني
الامن خانني التعبير ابيه يكون لي لسان
ابي لامن سكت القاه ..يفهم من نظر عيني
ابي لا من تعبت وضقت يلم الروح بالاحضان
ابيه يكون لي كتاب اذا ضاعت عناويني
ابي اعشق وابي اغرم وببني للهوى بنيان
ابيه يكون مبنى ضخم ويسكن فيه مغليني
ابي واحد يسكن بي وابطرد لاجله السكان
ابي يسكن وسط قلبي وعمره ما يخليني
ابي اشعل شموع الحب وباعطي من الغلا بستان
ابي اهديه باقة ورد ..مسقيها شراييني .
