و زى ما انتوا عارفين ان العنب ممنوع فى الرجيم و انا من بدات الرجيم
ما اكلت العنب اخاف منه
لكن نفسى فيه ومنعت نفسى بالقوه عنه المهم قولت انا اعمل رجيم للعنب بس بحيث
اشبع رغبتى منه و اكل لحد الشبع و فى نفس الوقت وزنى ما يزيد مش
مشكله ينقص المهم انه ما يزيد تانى
طبعا عملت بحث فى النت و لقيت ان للعنب فوائد كتيره و انه بينقى الجسم
من السموم
طبعا اتحمست و من يوم السبت بدات الرجيم و قبلها بيوم كنت عامله يوم فرى
برغم انى قريت ان الشخص لازم يصوم قبل ما يبدا رجيم العنب كتمهيد للجسم انما
انا بصراحه بدات علطول
و يومى فى الفرى كان كله تقريبا حلويات و سكريات
المهم روحت وزنت نفسى لقيتنى 72 كيلو
و بدات السبت و للاسف لقيت الدوره نزلت عليا بقيت محتاره اكمل و لا استنى
لما الدوره تخلص
المهم قررت انى لازم ابدا و ان العنب له فوايد لانه حينقى جسمى من السموم
طبعا اول يوم ما حسيت باى جوع لانى كنت باكل العنب كل ساعتين و بينهم
اشرب مايه كتيره
و كنت باكل عنب زى ما انا عايزه مش بمنع نفسى و نوع العنب اللى
استخدمته كان اخضر عنب بناتى
و بصراحه ايام الدوره عدت عليا سهله جدا و حسيت ان بطنى حصل فيها غسيل
لمعدتى و امعائى الغليظه و امعائى الدقيقه بجد كان روووووووعه و حسيت ان جسمى حصل
فيه عمليه غسيل دا غير ان بعض الاخوات بيشتكوا انه بيعمل ريحه كريهه فى الفم
بالعكس تماما حتلاقى ريحة فمك رائعه جدا لانك بتاكل كل ساعتين دا غير ان العنب
بيخلصك من كل الفضلات اللى فى معدتك و بطنك كلها
احيانا كان بيجينى صدااع بسيط و خمول لكن مش بيستمر كتير لانى باكل اى كميه
انا عاوزاها و بشرب مايه
بجد مبسوطه اوى و ريحة فمى بقت رائعه جدا
و طبعا وزنت نفسى اليوم الصبح و كانت المفاجاه لقيت نفسى ناقصه 3 كيلو فى
3 ايام الحمدلله و بقيت 69 و طبعا ححافظ على نظام اكلى عشان ما يرجعش
وزنى بسرعه
وملحوظه منى انا مش بحب رجيم النوع الواحد ابدا لكن العنب اعتبريه علاج مش رجيم
لان حتحسى ان بطنك نضفت من كل الفضلات اللى فيها و حترتاحى جدا
اتمنى اكون افدتكم بتجربتى
و اللى عندها اى استفسار انا جاهزه
و دا رابط الموضوع اللى شجعنى على الرجيم
4 كيلو في 3 ايام!!!!!!(رجيم العنب) – علاج السمنة والنحافة
