الله يهون على كل الحوامل … ويرزقهم الذرية الصالحة السليمة ..
حبيت افيدكم بتجربتي في ابرة الظهر .. لان كثير من البنات محتارات ومتخوفات منها ..
طوال شهور حملي وانا استخير
فيها … وكنت ابيها بشدة .. لان انا مقررين علي طلق صناعي على طول …
وقد جربته بدون مسكنات … وشفت
الموت بعيوني … فصار عندي فوبيا من الطلق صناعي …
انا والدة لي فترة بسيطة والحمدلله على فضله … اخذت ابرة الظهر في مستشفى دلة
..
رحت لهم كانوا محددين لي موعد طلق صناعي علشاني خلصت التاسع ولافيه بوادر ولادة ..
عطوني طلق صناعي .. وزاد علي الالم واقول لهم وين ابرة الظهر قالوا مانعطيها الا
بعد ماينفتح الرحم 3 سم ويوصل
4 سم يعني بين هالسانتيين .. لما انفتح 3 سم طلعوني لغرفة الولادة … وجاء
الدكتور الاستشاري خالد رئيس قسم
التخدير … الله يجزاه خير دنيا واخرة انسان محترم جدا لايمكن يناظر فيك يتكلم معي
وهو مايل على جنب او منزل
راسه تحت … طول الوقت يذكر الله ويسمي ويشرح لي كيف تعمل ابرة الظهر وانه
ماعاد لها اي مخاطر لان لها 30 سنه
وهي تستخدم في الخارج وانه طوروها لحد مااختفت تقريبا كل اثارها الجانبية …
جلست على السرير واحنيت ظهري والممرضات لافين الشرشف علي من تحت وعلى فكرة قبل لاطلع
لغرفة الولادة
اخذوا مني تحليل دم .. تيست لحساسية ابرة الظهر اظن لاني لما سالت الممرضة قالت
علشان الابيدورال ..( ابرة الظهر ) ..
وجاء الدكتور وسمى باسم الله وحدد فقرة الظهر الموازية لعظام الحوض الجانبية وحددها بقلم خطاط
مدري وشهو ههههه
بعدين بخ بخاخ مخدر … وقال الابرة الاولى ابرة مخدرة علشان ماتحسين بضرب الابرة الكبيرة
ابرة الظهر ..
وبعدها ب 5 دقايق تقريبا .. دخل فيني ابرة الظهر …دخلها بعيد جدا يابنات في
عمق العصب واحسها عريضة زي
المسمار .. وكان مميلها شوي جهه اليسار … يابنات الابرة موب مؤلمة بقدر ماهي مزعجة
جدا كانه مسمار يبرم ..
وطلع الابرة وحط فيها قسطرة معلقة في مغذي ينقط فيه المخدر ولزق ظهري كثير علشان
ماتنفك ولزق باقي اللي حق
القسطرة على كتفي ولزقة برضوة كثير ….
وقال لي بتحسين بكل شي الا الالم لان مضروبة في المنطقة اللي ترسل اشارة الالم
للمخ وهالمنطقة اسمها العلمي
الابيدورال … نفس الاسم الطبي للابرة .. وقال ترى وحدة من رجولك بتتخدر مرة وفعلا
اتخدرت اليسرى نهائيا نفس
الجهه اللي ميل فيها الابرة مااقدرت احركها ابدا … وحسيت بالم في فقرات رقبتي جهة
اليسار .. وحسيت بصداع …
وحسيت بحكة في جسمي … هذي يابنات اعراضها الجانبية اللي حسيتها للامانة وكلها محتملة واقرب
للمزعجة اكثر
من المؤلمة … وسبحان الله الم الطلق اختفى نهائيا … وجهاز الطلق يضرب في المية
وانا ولا احس بشي مع انهم
زادوا لي الطلق الصناعي في الوريد …
وجنبي وحدة تولد تصيح بشكل مخيف يعني انا خفت انها بتموت … وانا من فضل
الكريم ماحسيت بشي … ونمت
اخذت لي غطة …. وبعد ساعتين حسيت ان البيبي نزل مرة وناديت النيرس وكشفت علي
قالت ايوة 8 سم
وودوني غرفة الولادة والحمدلله خلال ساعة ولدت وكنت احس بالطلقة بس بدون الم … كنت
احس زي الشد والانقباض
وادفع … لحد ما اخرجني ربي حبيبي من حلق الضيق الى وسع الطريق …
وودوني غرفة الملاحظة ساعة بعدين جت دكتورة وفكت عني قسطرة ابرة الظهر ولا حسيت بالم
نهائيا … وتركوا فيني
قسطرة البول لمدة 6 ساعات بعد الولادة قالوا خايفين تدوخين من ابرة الظهر مانقدر نخليك
تروحين للحمام ..
ختاما ابرة الظهر سعرها 1650 ريال … في مستشفى دلة … المستشفى رائع ومحترمين وعندهم
ذمة وزي
المستشفى الحكومي في العلاج … يعني مايستعجلون بالعملية ابدا يتركونها اخر حل … بس في
الرعاية غير والممرضات حبوبات جدا ..
وابرة الظهر نعمة عظيمة من ربي وتستخدم في امريكا وبريطانيا من اكثر من 30 سنة
…
ولو فيه خطر ما استخدمتها المستشفيات الحكومية ومنها مستشفى الحرس الوطني … والمستشفى العسكري ..
واهم شي الاستخارة ثم الاستخارة فيها وقبل كل شي التوكل على الله وحده موب دكتورة
ولا مستشفى ..
