والله اني مفارق شعر الغزل
بس من شفتك وانا ببحره غريق
كامل الاوصاف والحسن اكتمل
كملك ربي وخصك بالخليق
من كحل عينك عيوني تكتحل
وان تناظر بي يجي بعيني بريق
القمر وان شاهدك غاب وافل
يستحي في محجر عيونك يويق
صورك ربي سبحانه وجل
تاج زين الكون بك وحدك يليق
القصايد كلها لك والجمل
تستحق الشعر دامك تستذيق
ياصلك شعري وانا مابعد اصل
كل ما اقدم دروبك لي تضيق
ارتويت الشعر فيني للثمل
وصرت اهوجس في قصيدي واستريق
ليتني يازين في عمر الجهل
وليت ربي ماجعلني لك عشيق
قبل اعرفك كنت مو هاوي غزل
ومن عرفتك شب في قلبي حريق
