على ذاك الطريق اللي يسمونه غرام احباب
وطت رجلي على دربه ولاادري وش نوى فيني
تبعته لاخر دروبه .. الين ان القمر قد غاب
تعب قلبي ، ولا تعبت مسافات توديني
لقيت الليلة الجردا : هدب ظل وسما واعشاب
بعد ذاك الظلام اللي يتوهني عناويني
صدفتك معجبه فيني وياليت..الغرام : اعجاب
وتراك انتي الهنوف اللي هقيتك تستحقيني
عطيتك عشق من قلبي..وسلمت لغلاك رقاب
وغيرك يحترق قلبه ولا يقدر يحاكيني
انا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني
رماني حظي العاثر عليك وجيت لك طلاب
ولا انتي اللي عشقتيني ولا انتي اللي عتقتيني
تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني
تعدي في سما عشقي ولو عشقي خراب اصحاب
وصوني بالهوى نفسك قبل لا انتي تصونيني
وشيليني على متنك : خفوق باري منصاب
ومن فوق الغرام العذب .. شيليني وحطيني
ولا منك هقيتيني شجاع وما يطيق يهاب
انا لك بالهوى والله مثل ما انتي هقيتيني
انا ما امشي ورا غيرك ولو انه يطق الباب
وترى عيب علي اطعن..ولو كثرت سكاكيني
زهود ما يطيق الدم لا داين ولا طلاب
شجاع وعارف نفسي واظن انك تعرفيني
غيور ماعرفت اضحك مع الغدر ببرود اعصاب
ابيع عيوني الثنتين قبل انك تخونيني
اذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشق يوطيني
انا رجل ولي غيره .. واذا شفت الهوى كذاب
تثور بقلبي الفزعه ولا تهدى شياطيني
سؤالك لو يزعزع بي كياني ما قبلت عتاب
اجي لك واسالك نفس السؤال اللي سالتيني
عن العشق القديم ابواب .. تقفيها كثير ابواب
بعد ذاك الحبيب اللي خدعني وانخدع فيني
ابي عشق تحسب له كل نظرات العيون حساب
وابي قلب علي قلبي ، وابى دين على ديني
وابي نظرة عطا توفي ولا تخلف بدون اسباب
وابي منك قبل لا نتي تصديني .. توديني
وابي درب على العذال صعب ومتعب وغلاب
وابي نفس الطريق الصعب يبعدهم ويدنيني
ترى لو للقلوب عيون ولدموع العيون اهداب
حشى ما تنزل الدمعه لغيرك لو تركتيني
انا اول من عرف قدرك وانا توي صغير وشاب
وابي منك ما دام انك عرفتيني تحبيني
ما دام اني لقيتك في طريق اسمه غرام احباب
دخيل الله ، وبعد الله دخيلك .. لا تخليني
ما دام ان كل من يحيا على وجه التراب تراب
عسى تنساني الدنيا مادام انتي ذكرتيني
