طريق سلامه..
طريق خير ماتبقي طريق ندامه
طريق السلامه وعهد ماننساك…..من هنا لين يجوز صغير ضناك
اللي طال صوبك زاهيات ايامه……ايكمل اسنين العمر هو واياك
ورده طريه تبتسم قدامه ……كل يوم يستنشق في عبير شذاك
امعاك يا جميله امساعدات اقسامه …….وين ما جري فيك النصيب خذاك
ولا انقولك عندي عليك ملامه ……….الله ايسامحك فيهن ايام معاك
اعداد مانظرتك حلم في حلامه ……….واعداد مارفعت العين في مرجاك
وعلي عد ماخيم الليل ظلامه ……..واعداد مابكيت ابدمعتي نجواك
واعداد ماشكالك خاطري بالامه …….واعداد ماتلطفلك ايريد ارضاك
يا سمح زوله يا كحيل اميامه……… يا لطيف في شكله اتقول ملاك
انتي صورتك في القلب كيف الشامه…… مطبوعه ابطول العمر مانمحاك
وفي ايام عمري غلاك علامه……..انكمل حياتي في ونس ذكراك
طريق خير ماتبقي طريق ندامه
طريقك نور…
طريق كلها بيضا هنا واسرور
ودربك زها بالورد لك منثور……الريحان قدامك صبغ هناك
والله يحفظك من كل عين غيور……. وكل من زرعلك في الطريق اشواك
يا سمح وصفه يا غزال القور ……..وحق من خلق زولك ومن سماك
اليوم من افراقك خاطري مكسور……. انرايف عليك اليوم ما نلقاك
عليك والفت بعدك عليها زور……. انكان تشغلك حالة العين بلاك
تاخذ الياليها ابكا واسمور……… ولاتنام من جرحك اللي فتاك
وعلي شان حبيتك ابكل شعور…… ايام المعزه والغلا هذاك
وعلي شان زولك والعيون الحور………..والبسمه اللي ربي ابها حلاك
واخدود ارهاف ومضحكك بلور…….. ومكمن انوثه في جمال شفاك
غلاك في زوايا خاطري محفور… وبلسم اجروحي في نسيم هواك
طريق كلها بيضا هنا واسرور
