فلان الفلاني اللي كان يومها جنبي
ساعة لما بداوا في ضرب الرصاص
فلان الفلاني اللي معرفش اسمه
ف دايما بقول يابن عمي وخلاص
فلان اللي سابلي بقيت سندوتشه
ليلة لما شافني بغني و جعان
فلان اللي مش فاكره غير شكل وشه
فلان اللي عداكي جوه الميدان
فلان اللي فتشني بالابتسامه
فلان اللي قال هو فعلا حيمشي ؟
فلان اللي قاللي طريق السلامة
ساعة لما قولنا زهقنا وحنمشي
فلان اللي مرضيش ياخد مني اجره
ساعة لما قلت اني رايح مظاهره
فلان اللي قاللي حيتنحى بكره
وحنفرح و نرقص و راح تبقى سهره
فلان اللي بالفيسبا طالع و داخل
يجيب اللي يتصاب من الضرب جوه
فلان اللي ف الضرب عند المداخل
يرجع صحابه.. و يستنى هوه
فلان اللي كان بيناولني القزايز
ويقفلها بعد اما اعبيها جاز
فلان اللي يشرب ويسالني عايز ؟
فلان اللي كان وشه مليان قزاز
فلان اللي وزع عليك بطانية
ويسال “فيه جنبك مكان ع الرصيف ؟”
فلان اللي نازل عشان القضية
فلان اللي نازل عشان الرغيف
فلان اللي مطلعش جوه البرامج
وكان بس صوته في قلب الهتاف
فلان اللي روح اكل واستحمى
فلان اللي ضايع في وسط ال الاف
فلان اللي غرقلي خل الكوفيه
و شالني ساعة لما جت طلقه فيا
فلان اللي مات يومها تلزمله ديه
من ابن الفلاني اللي كل لحمه حاف
فلان الفلاني اللي معرفش اسمه
ف دايما بقول يابن عمي وخلاص
