شعور سخيف
انك تحس بان وطنك شيء ضعيف
صوتك ضعيف
رايك ضعيف
انك تبيع قلبك وجسمك
وانك تبيع قلمك واسمك
ما يجيبوش حق الرغيف
سالوا جحا عن سر ضحكه
قالك اصل اتنين وشبكو
اللى كان من تحت ميت
واللى كان من فوق كفيف
دا شعور سخيف
وشعور سخيف
انك تكون رمز الشحاتة
تبنى مبنى للشحاتة
تعمل وزراة للشحاتة
يا ساقية دورى … عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى انا اتغميت
انا اللى صاحب البيت
عايش بدون لازمة
ولما مرة شكيت
ادونى بالجزمة
مش لاقي تطفح اديك
هاتولنا .. و جيبولنا .. و ادونا .. ودونا
هنجيب منين نديك
مش لاقي تطفح اديك
طافح يا بلدي غدايا
ولوعتي غدايه
و ادي الاحبه التقوا
و اتجمعوا عدايا
انا اللى زارعك دهب
بتاكلينى سباخ
ان كان دة تقل ودلع
بزيادة دلعك باخ
لا شفت فيكى هنا
ولا شفت فيكى ترف
كل اللى فيكى قرف
كرامتنا متهانة
واللقمة باهانة
بتخلفينا ليه لما انتى كارهانا
يعنى ايه تبقى انتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع
لما قش الرز ثروة بتتحرق
واما نفط الامة ثروة بتتسرق
واما جلادك على ولادك بيبطش
واما علمك ما يلاقيش ياكل فيطفش
يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس اربع سنين حبس احتياطى
حبس اعتباطي
يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته
انا عمرى ما اتامرت
ولا حطيت شروطى
ومكان ما ترسى مركبك
بابنى شطوطى
انا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى ارضك اتمرمغت فيه
وكل يوم عشتيه
انا اتغذبت بيه
بتكرهينى عيونك السودة
وايامى اللى فاتت
مانتيش حبيبيتى من النهاردة
حبيبتى ماتت
على صوت ادانك جرس
فى الشدة صاحينلك
من امتى كانوا الحرس
هما اللى باقينلك
بعتينى علشانهم
وعنيكى معصوبة
ياهل ترى خاينة
ولا زيى مغصوبة
كل الكلام اتقال
والشعر بقى ماسخ
والصبر علو جبال
والظلم شىء راسخ
وطن وغرقان فى النطاعة
كل شىء ريحته نطاعة
علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام
مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
انا لما قلت لك بحبك
كان نفاق
الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى اعيش علشان هدف
علشان رسالة
يعنى احس بقيمتى فيكى
انى مش عايش عوالة
يعنى لما اعرق تكافئيى بعدالة
الحب حالة
الحب مش شعر وقوالة
الحب حاجة ما تتوجدش فى وسط ناس
بتجيب غداها من صناديق الزبالة
بارت مراعينا والبئر قد جف
والجوع يكوينا والصبر ما كفى
والقلب لا يهدا والجرح لا يشفى
ولاننا طوع
زنا لهم خفا
جاءوا بموكبهم
واشتغلت الزفة
الدفة مظبوطة
واصلا مافيش دفة
والكفة مش مايلة
علشان مافيش كفة
و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى … ماشى
الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك
احنا اهلك
احنا رجالتك عمادك
احنا وقت الشدة سندك
احنا زادك
يا جحا احمى ولادك
لو كنت عايز تحمى طينك
سوف ارحل
ربما يلقانى من ارجو لقاه
هامشى ويا الشحاتين
وابكى على حلمى اللى تاه
بس مش هاشحت رغيف
هاشحت وطن لله
لا انا نقصان ولا ضعفان
ولا مسطول ولا سكران
ولا زايغ من عيني الضي
ولا حد احسن مني في شي
بس بغير
واللي قالولك غيرة الراجل قلة ثقة او قلة فهم
خلق حمير
غيرة الراجل نار في مراجل
نار بتنور مابتحرقش
واحنا صعايدة بنستحملش
شمسنا حامية وعرقنا حامي وطبعنا حامي
واللي تخلي صعيدي يحبها
يبقى يا غلبها
اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخليها مداس للناس؟؟
ولا حتقفلي اوضة عليها بميت ترباس
يمكن حتى تاجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي
لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟
ثم العبرة ماهيش في اللبس
اصل المشكلة عندك .. عندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
ماشي صداقة وماشي زمالة
بس ماجتش على الرجالة
ماهي نسوان الدنيا كتير
وانا ما بقولش تخاصمي الناس
ولا تتحجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير
