ماكل من يركب على الخيل خيال
ولا كل خيل تعجبك هي اصيله
ولاكل من يعجبك هرجه برجال
بعض العرب ملسون وايده بخيله
الكل يلبس ثوب وشماغ وعقال
وعند اللزوم افعالهم هي قليله
الرجل تثبت له اقاويل بافعال
لاقال شئ ونفذه هو دليله
والرجل لاشفته مع القيل والقال
ابعد عنه هذا صفاته عليله
والكذب خله عنك مافاد لو طال
قول الصدق ياصاح غنم وجميله
وخلك شجاع وذي صفات للابطال
اللي كما سيوف تبارق سليله
واللي شراك اشريه لو كان بالمال
خلك معه وان مال دور بديله
واصبر ترى الدنيا تبدل بها احوال
وما كل شئ صافي تشوفه تجيله
وبعدالكدر تشرب صفا عذب وزلال
هذا الزمن فيه استقامه وميله
وصاحب خليل لو جفا الوقت ما مال
ترى الرجل يعرف بقيمة خليله
واقفل على سرك بكتمان واقفال
بعض العرب يسمع وينوي بحيله
وخلك امين اذا توليت الاعمال
من خان في يوم الحشر يا حليله
