القصيدة دى فوق الخيال جامدة جدا , قصيدة المكالمة كلمات

كلمات قصيدة المكالمة كاملة لهشام الجخ

.

خلاص عرفت

عملوا ثورة وشالوا زفت

بس ما تقوليش خلاص مشوا حمارك !

اى واحد بعده هنخليه حمارنا ..

حتى لو ماكانش اسمه ” .. حمارك ” !

شعب مين يا جحش انت ؟

هي مصر امتى حكمها شعب ..

مصر بتسلم ودانها لاى كلب ..

بس يتزوق شوية !

شرعية !

ديموقراطية

ليبرالية

عسكرية

اى كلمة فيها ” اية ”

اى كلمة تكون ” طرية ”

الشباب المصرى منظر ..

كله فاكر نفسه عنتر ..

انفخوهم انتوا بس وعظموهم !

فهموهم ان رايه ده امانة ..

و ان اى كلام يخالف رايه اوبا .. يبقى بدات الخيانة ..

وافردوا اديكم شوية بالفلوس .. الناس جعانة .

فنانين ! .. فنانين و مثقفين دول عند خالتك ..

دول شحاتين !

يابنى كله قصاد فلوسك ..

راح يبوسك ..

فيه ولد شاعر كويس ..

شوفته مرة بيشتم الريس ..

طلعوا الولد ده فى الاعلام كتير !

اشتروه حتى لو كان سعره غالى ..

هاتوا رجله واحدة واحدة و بالطريقة ..

و اكسروا عينه وداغه..

بس اوعوا يحس بينا ..

خلوه كده مصدق دماغه

اديه فلوس .. ادوه كتير !

واحدة واحدة هيبقى واحد م الحمير !

و الحمير واقفين طابور ..

و احنا مالناش اى دور ..

احنا بس يادوب بنديهم فلوس !

بس احنا مش على المسرح يابابا ..

احنا فين ؟ .. في الكالوس !

هما هيادوا الوظيفة فرد فرد ..

احنا هنجيب الديكور و نظبط اضاءة .. يبقى عرض .

هما ثورة و هما شعب .. ياكلوا بعض ..

اما احنا ..

احنا نسمة .. احنا بلسم ..

وحلنى على بال ما حد يفوق و يفهم ..

____

– ليه يا شيخنا ..

طب هنعمل ايه يا شيخنا ..

طول ماهو الاعلام ( سالخنا )

و احنا برضو يعنى لسة مسيطرين !

طول ما الناس جعانة و مطحونين !

الجوع جهالة .. و الجهل جوع ..

و الجوامع تحت ايدنا فى البلاد و فى النجوع ..

هى الناس هتفهم ” ليبرالية ” وماركسية” ..

الناس هتفهم ” اسلامية ” ..

الغلابة فى القرى ما لهمش خلق للحوار ..

دول ناس غلابة !

يا اما ” جنة ” يا اما ” نار ” ..

و احنا طبعا طرح جنة ..

هى الناس هتاخد دينها عنهم ولا عنا ؟ ..

احنا اللى بنقول الحرام و احنا اللى بنقول الحلال !

احنا اللى هنسوقهم يمين و احنا اللى هنسوقهم شمال !

الفنانين ..

ان كان ممثل ولا مطرب ولا شاعر !

اللى يناصرنا هنمدحه بالخيرو نذكر اسمه ع المنابر !

و اللى يعادينا ياكش ما يكون شيخ بعمة هنقول ده فاجر .. ولا كافر !

و الناس بتمشى ورا الخطب ..

و الجهل ناره قايدة قايدة !

احنا بس يا دوب هنرميله الحطب ..

___________

– تمام يا فندم ..

كل متظبط و متشيك و متهندم يا فندم ..

هو بعد الناس ما شافت حد ليه وش يتكلم يا فندم ..

طبعا الاعلام بتاعنا وطنى حر ..

احنا بس خايفين نفتح الخيط للعيال لا الخير يكر ..

دى سحابة صيف يا فندم هتاخد وقتها وعلى طول تمر ..

الرموز الاعلامية ..

الصراحة مية مية ..

و هى دى الديموقراطية ..

احنا ما معناش مذيع يطلع على القنوات و ينقد ونشتم ..

احنا بنقفل القنوات يا فندم

الشعب منحاز لينا طبعا ..

بالتمام ..

فنانين و ومثقفين و مطربين .. مفيش كلام ..

ايوة طبعا غنوا لينا !

ايوة غنوا لمصر طبعا يبقى طبعا غنوا لينا !

قالو ايه ؟ قالو :

” مصر يا اما يا سفينة ..

مصر عايشة فى بحر هايج و احنا ربان السفينة ..

تسلم .. .. تسلم الايد اللى ربت تسلم الكيكة العجينة ”

احنا مش فاضيين يا فندم للاغانى وللكلام ..

الكلاب هي اللى فاضية للنباح !

اما احنا بتوع سلاح !

________

” الشعر مصلوب على وتر الوريد ..

كفراشة دامت بكل محاجر العهر استفاقت ..

نملة تشتم منساة الرسول و ترفع الاحلام شعبا لا يريد ..

وجع على الابواب يكسر نابه ..

قل للسراب متى سيفتح بابه ..

ف انا مللت من الحكايا كل ليل دون ان ياتى جديد ..

النيل اهات ورمز للجياع ..

خذ كل ما ياتى لتهداة الضباع ..

و اركض على الاسفلت و اقتل طفلة لا يعرف العشاق معنى عشقهم الا باوقات الوداع
..

الشعر مصلوب على وتر الوريد ..

و انا على المرسى الطويل ..

كماء بحر من حديد .. ”

و انا مياه من نيلك يا بلدى ..

و انا مياه من طينك يا بلدى ..

انا مش معهم كلهم !

ولانيش تبعهم كلهم !

لسانى فاكر مشية الكورنيش و ايدك ..

وحشنى رمضانك و الفطور على صوت ادان رفعت و عيدك ..

وسط البلد وحشتنى من غير الحواجز و الحجارة !

انا كنت زمان بمشى ماكنتش اعرف ان في الشارع وزارة !

كنت بتحامى بعينيكى و بايد حبيبتى و بالسيجارة !

كنت بدفى اما بركب ميكروباص ..

عملت كل حاجة تزعلك لكنى ما ضربتش رصاص ..

وسط البلد نسيت صوابعى اللى اتهروا ..

نسيت سجايرى الفرط و هدومى اللى دابوا واتبروا ..

يا عم يا بتاع الخطب يا عم يابتاع السلاح !

هو احنا يعنى يا اما نبقى سداح بداح !

يا اما تطغوا وتفتروا ..

بزيادة لينا 3 سنين بتبيعوا فينا و تشتروا ..

احنا البلد ..

احنا السند و المستند ..

احنا اللى قبل ما تبنى سدك كنا سند ..

و احنا اللى علشان القنال كانت ضهورنا بتتجلد ..

احنا البلد ..

ملعون ابو اللى ما داقش جوعى !

و ان كنت مش هصعب عليه و الله ما هوريه دموعى !

انا اقوى منكم ..

انا جدر ضارب فى البلد دى غصب عنكم ..

يا عم يابتاع السلاح . يا عم يا بتاع الخطب !

تركتكوا اصلا نخل شاخ ولا عادش بينزل رطب !

انا مش طرف في خناقة الحكم اللى قفلت قلبكم ..

انا قلبى مؤمن ان ملك الله بيهبه لمن يهب !

بس اوعى تفتكر انى هرضى بجوع عيالى ..

او انى اشوف بلدى قصادى بتتنهب !

و الله معمولك عمل ..

شعب اتنحس على نحس همى !

شعب اتوقف على حرق دمى !

ادب ايدى في غيط شعور ..

عشمان انول بدر البدور ..

يطلعلى شال امى !

لو حد زعلان انى ثورت ..

ادينى غورت ..

بطلت ثورة و بطلت نيلة

و شلت على راسى التقيلة

ملناش يا عم نصيب نفرح بخلفتنا ..

ما يترضى بالمكتوب يا ترضى بالفتنة ..

يا دوب شافونى عريس

نصبوا الطريق متاريس

وحاصروا زفتنا ..

هندارى ليه و نلف و نداري فى الالاعيب ..

الاعتراف مش عيب ..

لو كنا شوفنا الغيب ..

لا كنا قندلنا ولا كنا زفتنا !

صعبان عليا الحلم ..

شايفه بيتكسر ..

و عينيا طايلة المدى

بس الايدين اقصر ..

انا اللى عمره ما غاب

و عمره ما اتاخر ..

تطرح عينيكى عذاب

يزرع عينيه سكر ..

انا اللى قال حاضر

لا شرط ولا اتامر ..

ولا طمع ولا اتدانى

ولا بطش ولا اتجبر ..

انا اللي كل ما اجوع

ببعينيكى بتصبر ..

ما يغركيش العدد

و الله انا اكتر ..

انا اللى مش اخوان

و انا اللى مش عسكر