غلا مايصير كذا لك يومين مااكلتي شئ >
قالتها مضاوي بنت عم غلا لغلا
وكملت مضاوي بعد ماشافت مافيه تجاوب من غلا/ حرام عليك عيونك تعبت من كثر البكاء
انا بنادي ابوي يمكن يقدر فيك
وطلعت مضاوي تاركه غلا بحاله تقطع القلب كان واضح عليها التعب ووجهها ذبلان ومسحه حزن
تغطي ووجهها
اول ماطلعت مضاوي جلست غلا تفكر بنفسها صح انها عمياء لكن عيونها زادت بالالم من
شده البكاء وطول عمرها مؤمنة بقدرها لكن كانت تتمنى يرجع لها نظرها لثواني عشان تشوف
زايد
واول ماتذكرت زايد غطت راسها بالبطانيه عشان تنسى لكن الذكريات تدفقت بعقلها بحلوها ومرها
@@@@@@@@@@@@
ضحكت غلا اول ماسمعت الاغنيه وقاطعت الاغنيه/ خلاص درينا انك جيت والا لازم تصك راسي
بصوتك النشاز
قال زايد/ افااااا عليك ياغلايه صوتي نشاز
غلا/ ياحرام حطمت قلبك ؟
زايد بصوت مسرحي/ يااااااه كم اتمنى لو قدرتي موهبتي يوما ايتها الفتاة الحمقاء
قلدته غلا بنفس الاسلوب/ ماذا انا حمقاء ويحك يارجل هيا طلقني وارحم نفسك من حماقتي
زايد/ اطلقك!!!!! فعلا انتي حمقاء و عوباء
ضحكت غلا من قلب
قال زايد/ اروح وطي من الضحكه وراعيتها
غلا/ يله عاد لايسمعك ابوي
زايد بتنهيده/ اييييييه متى الله يرحمني ونسوي العرس يله ماعلينا انتي وش تسوين
غلا/ شوفت عينك بسوي قهوه
زايد/ اقعد تعرفين تسوين قهوه
غلا/ ليه عشاني عمياء ماعرف اسوي قهوه
ضربها زايد بكتفه على كتفها/ يله عاد بلا دلع بس انتي ماتشربين قهوة فوشوله تسوينها
غلا/ بس ابوي يشربها عشان كذا اسويها له
زايد/ ياالله ياعمي عليه مزاج بالله فيه احد يشرب القهوه الظهر
غلا/ ايه فيه ابوي
بعدين رح اجلس عند ابوي بدال ماانت مقابلني وماخليتني اكمل شغلي
قرب زايد منها وقال باذنها بهمس ناعم/ انا عارف انك ماتركزين وانا جنبك بس هذا
قدرك تحمليني
غلا وهي تدفه/ روح زين
طلع زايد وهو يضحك وجلست غلا تكمل القهوه
@@@@@@@@@@@@
اول ماشاف زايد غلا جايه تشيل القهوه فز على طول واخذ منها القهوه ومسكها بيدها
وجلسها جنبه
ضحك ابو غلا وقال/ انا ماادري ماتستحي على وجهك تسوي حركاتك قدامي
قال زايد وهو يصب القهوه/ مايستحي الا الغلطان وهذي زوجتي وانت بنفسك مزوجنيها ولا نسيت
الاب/ انسي!!!! وشلون انسى وانت مرتز عندي
اربع وعشرين ساعه
زايد بهزه راس/ لاحول ولاقوة الا بالله البنت تكرشني والابو طفشان مني انا ماادري من
اللي دعا علي
ضربته غلا وقالت/ وش قصدك دعا عليك حنا بلوه
زايد / وهو يشرب القهوه
اي والله بلوه بلاني الله بحبكم
ضحكت غلا وابوها
قام الاب وقال/ يله بروح انسدح شوي قبل اذان العصر والبيت بيتك مع اني عارف
انك حافظ هالعباره
زايد/ دامني غاثك لها الدرجه خلنا نسوي العرس وارتاح
الاب/ العرس لاجاء وليد من البعثه
وراح وخلاهم واول ماطلع الاب كان يطمر زايد ويزين جلسته بقبال غلا
قال/ اخوك ماعنده نيه يجي ؟
غلا/ والله ماادري بعثته اربع سنين وباقيله سنه
زايد/ اوووووووف سنه بعد انا يالله تحملت سنه بعد باقي سنه الله يعين بس
وضحكت غلا وسكت شوي ثم قال بصوت رومنسي/ غلا
غلا/ هاه
زايد بضربه خفيفه على يدها/ وهواه انا كم مره اقولك قولي لبيه
غلا/ اقعد يالبيه اذا عدلت اسلوبك قلت لك لبيه
قال زايد/ ماسالتيني عن برنامجي امس
غلا/ صح نسيت وش سويت امس ؟
مسك يدها وقام يعد باصابعها وقال/ واحد_اول ماقمت من النوم جلست شوي ثم تغديت
اثنين_طلعت مع الشباب لكشته بسيطه جلسنا للمغرب ثم رجعنا
ثلاثه_رجعت البيت ولقيت خالتي وبناتها عندنا
اربعه_ جلست اسولف معهم شوي ثم قمت اخذ شاور
خمسه_طلعت بال…………..وش فيك ؟
سحبت غلا يدها وقالت بصوت متكدر/ مافيني شئ
زايد/ غلايه انا عارفك زين وش فيك
غلا/ مافيني شئ
وسكتت شوي ثم قالت بصوت حاولت يكون غير مبالي/ تقولي جلست مع خالتك وبناتها
عرف زايد انها غارت فحب يرفع ضغطها شوي وقال بحماس/ اي جلست وقعدت اسولف مع
البنات خصوصا مها تصدقين طلعت فله
غلا/ اهاا
كمل زايد / فله ومزيونه بسم الله عليها
سمع شهقه من غلا حاولت تكتمها
ومسك نفسه مايضحك
غلا بارتباك/ بسم الله عليها….المهم ماودك تروح عشان انا ودي انام شوي
زايد وهو مستانس/ بس ماكملت لك وش سولفت فيه مع مها
غلا/ ياحليلكم احتفظ بسواليفكم السامجه لنفسك
زايد بابتسامه/ سامجه الله يسامحك اغلطي علي عادي بس مها مااذتك بنت الناس وشكلها محترمه
عصبت غلا وفقدت تماسكها وقالت/ ياسلام دامها جايزتلك هالكثر ورى ماتاخذها وتريح نفسك بدال ماانت
قاعد تمدح وتجزل في الثناء لسيده الحسن و ت…………
مات زايد من الضحك لان صار اللي يبيه
قالت غلا بصوت مقهور/ وش يضحك انشاالله
زايد/ ياقلبي كل هذا حب لي
غلا/ وشو
زايد/ دامك تحبيني لدرجه تغارين علي هالكثر ليش ماتقولين
غلا بارتباك/ اي حب واي غيره شكلك حششت
زايد/ يله عاد انا حبيت ارفع ضغطك ولا لاجلست مع مها ولاشئ بس سلمت على
خالتي وطلعت فوق
غلا وهي تضربه/ ليش تلعب باعصابي كذا
زايد/ اثرك طلعتي تحبيني وانا ماادري ومخليتني اهوجس انتي تحبيني ولا لا
غلا/ يله عاد بلا قله ادب
زايد/ يااخي لو مره قولي احبك لو مجامله بس شكلي بابطي عظم وماسمعتها
جلست غلا تضحك قال زايد/ اقول غلا وش رايك اليوم نطلع نتعشى برى
غلا/ انت عارف ان ابوي مايرضى
زايد/ ياحووول طيب نروح نتمشى لو بالسوق
غلا/ الله يالسوق اصلن مادخلته عقب اول مره شفتك فيها
وكملت بصوت واطي/ وهزئتني
ضحك زايد وقال/ لاتلوميني تنرفزت من اللي جايه صقعتني وكبت علي الكابتشينو ولا بعد كان
حار احرق اصابعي
ضحكت غلا وهي تتذكر الموقف
وحس ان البنت دمعت عيونها واستغرب ومادرى الا بوحده جايه تركض وتقول/ اسفه ماعليش
ومسكت البنت بيدها عرف زايد انها عمياء وراح لاخوياه وهو مصدوم وقالهم السالفه وعصبوا عليهم
وقالهم انه مادرى قالوا له كان تعذرت فطمر مع شلته يدورونها بالسوق لحد مالقاها طالعه
تركب السياره لحقوهم وعرف بيتهم في البداية كان السالفه اعتذار وبس
لكن اول مارجع البيت لقى اهله يبون يخطبوله مها بس هو تردد وماعطاهم الجواب
وصار يتردد كثير على بيت غلا وعرف انها وحيده مع ابوها وحس انه يميلها بس
ضحك على نفسه وقال متاثر بالافلام انا ووجهي
واول ماسالته امه عن مها رد بسرعه انه بيخطب بنت واول مادروا انها عمياء رفضوا
بالبدايه بس يوم شافوا الحاحه واصراره وافقوا وتقدمولها
في البدايه غلا رفضت لانها حست انه شفقان عليها بس ابوها اقنعها انه ونعم الرجال
وماراح يامن احد كثره عليها فاضطرت انها توافق لكن بعد ماجلست معه بعد الملكه حست
انه فعلا رجال ويحبها حتى هو اول ماشاف جمالها وادبها عرف انه ماراح يندم على
اختياره >
زايد/ يله عاد انا بروح قبل لايقوم عمي ويلقاني ويقول يامن شراله من حلاله عله
ضحكت غلا وقالت/ متى اشوفك
زايد/ يمكن اشوي امرك قبل لارجع البيت
وطلع وجلست غلا تفكر انها فعلا محظوظه فيه
غلا/ من عند الباب ?
فتحت غلا الباب وكان ريشاب هندي البقاله تموت فيه غلا لانه يعاملها مثل بنته وكان
بعمر ابوها وماكان ينطق اسمها زين يناديها خلا >
غلا/ هات ياريشاب
ومدت يدها
ريشاب/ وقف وقف ياخلا فيه رزال يفحط عند باب اصبر ابغى سوف ايس فيه
رجع ريشاب وقال/ هذا واحد مضيع يبغى حاره تاني يله سكر باب
وراح
وبعد العشاء جلست غلا تسولف مع ابوها
الاب/ الا اقول متى راح زايد
غلا/ قبل العصر بشوي
ضحك الاب وقال/ ياحليله والله له وحشه
غلا/ دامك تفقده وراك تكسحه
الاب/ لاياشيخه تبيني كل شوي امدحه ثم يشوف نفسه علينا
غلا/ حرام عليك زايد موب كذا
الاب بضحكه/ ايييييه موب كذا المهم اخوك مادق اليوم
غلا/ لامادق بس………….
الاب/ هه جاء قيس قومي افتحي الباب
فتحت غلا الباب ونزل زايد ودخل وقال/ مساء الخير ياوجه الخير
غلا بخجل/ هلا
زايد بهمس/ اشتقتيلي
سكتت غلا من الحياء ضحك زايد
قال الاب/ ورى ماتدخل يازايد
جلس زايد وسلم على عمه
الاب/ هذا وش اللي معك
زايد/ هدية لغلا
الاب/ وش هي
زايد/ اقول عمي وش فيك صاير فضولي
الاب بضحكه/ يعني هونت ماتبي تقول لي
زايد بضحكه/ ليه انا كنت ناوي اقولك اصلن عشان اهون
ياحليلك ياعمي واثق من نفسك
ضحكت غلا وابوها
قام الاب/ يله بروح انام وانت لاتبلط هنا
زايد/ حاضر طال عمرك
واول ماراح ابو غلا طمر زايد كالعاده لغلا وقال/ تفضلي يااغلى غلا بالعالم
غلا بضحكه/ الله يستر لاتكون ملغمه
زايد/ لاتخافين ماراح افجرك الا اذا خنتيني عشان تصير قصه العاشق اللي فجر حبيبته
غلا/ لاياشيخ عاشق وتفجر هذا عاشق ارهابي بعدين ياخوفي انت اللي تخون
زايد/ افاااااا ياغلايه اللي يحب مايخون ويله بسرعه افتحي الهديه
فتحتها غلا مع مساعده من زايد وطلعت الهدية جوال
غلا/ وش اسويبه
زايد/ سويبه كيكه وش تسوين به بعد اكلمك وتكلميني فيه
غلا/ بس مااعرف له
زايد/ انا اعلمك اول شئ اذا سمعتيه يدق اضغطي ذا واذا بغيتي تدقين علي انا
مخزن رقمي بالاتصال السريع اضغطي رقم اثنين هذا ثم السماعه الخضراء هذي
واذا بغيتي تدقين على الشرطه دقي تسعه ثلاث مرات
ماتت غلا من الضحك وقالت/ اجل خلاص بسولف مع الشرطه واطنشك
زايد/ اي هين هذا اذا عطوك وجه وبعدين مافيه احد يعرف رقمك غيري يعني مااحد
معبرك غيري
غلا/ لاياشيخ
زايد/ واذا ارسلت رساله اضغطي ذا
غلا/ لاياشيخ وشلون بقرا رسالتك
زايد/ العالم تطور ابرسلك مقطع صوت والحين بدق عليك واشوف فهمتي ولالا
غلا/ ليه شايفني بقره ?
ودق عليها وعطته رفض
زايد/ تبيني اجاوبك عن سؤالك ?
ماتت غلا من الضحك وقامت تضحك من قلب
زايد/ ياويل حالي اذوب انا
زادت غلا بالضحك
زايد/ خلاص عاد ترى من جد اذوب
سكتت غلا بعد ضحك طويل
وجلس زايد يدق عليها وهي مره رفض ومره صامت الى حد ماتعلمت ثم ارسلها رساله
وتعلمت وشلون تفتحها
زايد/ بعدي والله صدق ذكيه
ويله انا بروح لان بكره عندي سفره
غلا برعب/ وين ?
زايد/ بروح مع الشباب للشرقيه
غلا/ ليه ?
زايد/ عرس خوينا بكره
غلا/ وكم بتقعدون ?
زايد/ ثلاث ايام
غلا/ ليه ناوين تروحون معه شهر العسل ?
ضحك زايد وقال/ لا بس عندي شغل
غلا/ وشو ?
زايد/ اشك انك في المباحث بس ماعلينا بروح اشوف وش صار بشهادتي حقت الدكتوراه
غلا بضحكه/ ايوه وش تخصصك انشاالله
زايد/ طب عيون
ضحكت غلا لانها عارفه انه يمزح
زايد/ وش يضحكك انا مو قلت لك اني راح ادرس طب
غلا/ ايه تدرس وانتي مقابلني اربع وعشرين ساعه
بعدين وش حدك على طب العيون
زايد بهمس ناعم/ عشانك
غلا انفجرت من الضحك وزايد ضحك منها وقال/ شكلك مكذبتني
غلا/ اكذب على قدك موب طب مره وحده
زايد/ ماعلينا تبين شئ
غلا/ سلامتك بس اتصل فيني اذا مشيت
زايد/ اقعد الحين اتصل فيني ولا قبل ناسيتني
ضحك وطلع وراحت غلا تنام
@@@@@@@@@@@@
فزت غلا من النوم تحسب زايد جاء بس طلع جوالها يدق وكان زايد حاط لها
النغمه هذي
غلا بصوت نعسان/ الو
زايد/ اشوى ماعطيتني رفض
غلا/ الساعه كم ?
زايد/ سبع الصبح
غلا/ اووف وش مصحيك هالحزه
زايد/ انتي ماقلتي لي دق علي اذا مشيت
غلا/ لامطيع والله
زايد/ شفتي زوج مطواع مثلي
غلا/ بس وش موديكم هالحزه
زايد/ عشان نلحق العرس ونساعد خوينا اذا يبي شئ يله عاد روحي نامي وبدق عليك
بعدين
غلا/ انتبهه والسرعه
زايد بادب مصطنع/ حاضر ماما مع السلامه
غلا/ مع السلامه
ورجعت نامت
اول ماقامت غلا دقت على زايد
زايد بضحكه/ اقعد ياجوال
غلا بضحكه/ شفت شلون اقول وينكم ?
زايد/ جالسين نتمشى بشوارع الشرقيه
غلا/ اها
زايد بنعومه/ اقول فقدوتنا ?
غلا بتنهيده/ اي والله
زايد بصرخه/ ااااااااااااه
اخيرا اعترفتوا
ماتت غلا من الضحك
زايد بصوت ناعم/ يااخي مابغيتوا تجبرون خاطرنا
غلا/ وراك تهرج كذا
زايد/ لابس عندي الشباب
عاد الشباب عرفوا انها غلا من صوت خويهم
كان يزاعقون
غلااااااااااااااااااااااا
ضحكت غلا
قال خويه/ انا اقول الرجال وراه ذايب
قال الثاني/ هذي غلا ياشيخ وماتبيه يخق
زايد/ يله عاد بلا لقافه
ضحكوا الشباب
زايد/ اكلمك شوي
غلا/ زين مع السلامه
زايد/ مع السلامه
وسكرت غلا
قال خويه/ ياعيني على الرومنسيه
زايد بتنهيده/ ايييييييه والله اني اشتقتلها
كان يزاعقون الشباب ويصفقون
قال خويه/ سبحان الله شفت وشلون اجتمعتوا
زايد/ ماادري وش كان حالي بدونها
قال الثاني/ الفضل لنا بعد الله حنا اللي خليناك تعتذر لها
زايد/ اقول سق وانت ساكت
وضحكوا الشباب
وجلس زايد يفكر بغلا اول مره تقوله انها فاقدته وهذا يدل على تحسن وجلس يضحك
وهو يتذكر وجهها وشلون يتغير اذا تغزل فيها
@@@@@@@@@@@@
غلا/ لا يامضاوي ماابي اروح
مضاوي/ غصب طيب بتروحين
غلا/ هاه وشوله اروح
مضاوي/ تغيرين جو
غلا/ معجبني جوي ومالي خلق للاحراج من البنات
مضاوي/ وش احراجه انتي لك سنين ماطلعتي ولازم تشوفين العالم وبعدين اول مره اشوفك تنحرجين
من عماك مع انك عارفه انه مقدر من ربك
غلا/ انا عارفه هالشئ بالعكس الوضع عندي عادي بس ماابي احرج البنات
مضاوي/ مالي شغل رايحه معي رايحه وقومي جيبلي قهوه يله
ضحكت غلا وقامت تجيب لبنت عمها القهوه
بعد ماراحت مضاوي دق زايد
زايد/ هلا وغلا
غلا بضحكه/ اهلين
زايد/ اقعد رديتي بسرعه
غلا/ خلاص تعودت المهم انت وين
زايد/ والله ياطويله العمر تونا زفينا المعرس
غلا متحمسه/ وش لون زفيتوه ?
زايد/ ركبناه حمار
غلا/ يله عاد
زايد/ يعني بالله وشلون زفيناه سويناله صف سيارات ومشينا فيه لبيت العروسه
وصورنا الزفه بس صراحه فليناها الله يوفقه انشاالله
غلا/ اها
زايد يقلدها/ اها خير وش فيك
غلا/ مافيني شئ بس بستشيرك بشئ
زايد/ فلوس ماعندي
وضحك
غلا/ من اولها كذا
زايد/ تفداك عيوني ياعيوني
غلا/ خل عيونك لك واسمع مضاوي تبيني اروح معها لحفله
زايد/ مضاوي من ?
غلا/ بنت عمي
زايد/ اها وانتي تبين تستاذنين مني
غلا/ لاياشيخ ابوي حي استاذنه هو موب انت
بس المشكله انا رافضه اروح ومضاوي ملزمه علي اروح معها وانا ماودي
زايد/ وليش ماودك ?
غلا/ ماادري ماابي احرج البنات هم اكيد ماراح ياخذون راحتهم زين وراح ينحرجون مني وانا……….
زايد/ بس بس تدرين عاد انا مع مضاوي وبتروحين غصب وانا اللي بوديك
غلا/ ياسلام الدعوه عناد
زايد/ ايه عناد انتي لمتى بتحرمين نفسك من الناس
غلا بهمس/ وش ابي بالناس تكفيني انت
زايد/ لالابس……………. وش قلتي تو
غلا بضحكه/ ماقلت شئ
زايد/ الا قلتي ياالله مشاعرك ماتدفق غير وانا بعيد
ضحكت غلا
زايد/ عموما انا راجع بعد بكره وبنشوف موضوع الحفله وبشوف اذا انتي مشتاقتلي صدق ولا
بس فرحه الجوال
وسكر وراحت غلا تنام
