شمعه الحب طفتها كفوف الليال
و استعادت مع الذكرى زمان بخيل
استعادت من الماضي قديم الوصال
حبنا اللي من اقدار الليالي قتيل
حبنا اللي تعدى في عطاه الخيال
ما بقى له من الماضي بقلبي قليل
كنت اضمه بروحي عن هبوب الشمال
و احترق في لهب ناره و حالي نحيل
ما احسب ان يموت الحب هذا محال
لا ولكن احسبه من فؤادي يزيل
لكن الشمس دايم تنحني للزوال
و ينتهي في اثرها كل يوم جميل
ما تدوم السعاده لو يطول المطال
و الشقا بالمحبه باقي و الدليل
اول الحب نظره وابتسامه دلال
و اخر الحب دمعه وابتعاد طويل
