بيت اكتب موضوع افيد فيه اخواتى زى ما استفدت منكم كتير ويارب اقدر افيدكم
طريقة سهلة ومن مكونات بسيطة ومتوافرة معظمها ف البيت وغير مكلفة لعمل سنفرة للجسم
اول حاجة افتحى مية سخنة جامد عشان تحصلى على بخار يفتح مسام الجسم بس طبعا
ماتجيبيش على جسمك المية السخنة اوى دى عشان ماتحرقش جلدك وبعدين اغسلى جسمك عادى بالليفة
والصابونة واشطفيه كخطوة لتليين الجسم لاستقبالالسنفرة وبعدين هاتى طبق ستانلس صغير تكونى محضرة فيه مكونات
السنفرة وهى عبارة عن الاتى :
ارز مطحون ودة معروف انه بيفتح البشرة وبيشيل الخلايا الميتة , اطحنيه فى البيت عادى
ترمس مطحون وطبعا معروف بفوايده للبشرة بجيبه من عند العطار مطحون جاهز باتنين جنيه بيديكى
كيس متوسط يكفى كتير
ملح
لبن بودرة كيس او كيسين على حسب حتعملى اد ايه
وباخر مكونين بنحصل على ملح حليب بدل ما تشتريه وطبعا كده ارخص
بتجيبى كميات متساوية من كل حاجة على حسب ناوية تعملى اد ايه وتخلطيهم وتحطيهم فى
برطمان كبير او صغير على حسب ما حتعملى انا بعمل برطمان كبير, وشيليه فى التلاجة
ولما تيجى تاخدى الشاور تاخدى البرطمان وتحطى شوية فى الطبق الاستنالس على حسب احتياجك وتعصرى
عليهم لمونتين وتقلبى وبعدين تاخدى بايدك وتفركى جسمك كله بحركات دائرية بحيث تكونى غطيتى جسمك
كله بالسنفرة وبعدين تجيبى ليفة خشنة اى ليفة بس تكون خشنة مش لازم الليفة المغربى
الى ب15 جنيه ومش متوافرة عند كل الناس هاتى من اى محل بلاستيكيات او ادوات
منزلية ليفة خشنة بتتلبس فى الايد زى الجوانتى ب2,5 جنيه ,هى طبعا الليفة المغربى احسن
بس لو مش موجودة مش معقول حنعفن يعنى ,حتقضى الغرض برده ,المهم, تفركى السنفرة على
جسمك بضغط متوسط يعنى خير الامور الوسط عشان الجسم بشرته حساسة ممكن تستخدمى الفرك الجامد
لكعب الرجل والركبة والكوع والظهر والكتف وظهر الرقبة عدا ذلك بدرجة وسط , وبعدين ركزى
على مناطق ثنايا الجلد وهاتى قشر الليمون وغمسى فى الخلطة وافركى المناطق دى , وبعدين
اشطفى جسمك بالمية الدافية حتحسى طبعا بفرق شاسع وان جسمك بيزحلق كده ونعم وافتح ,
وبعدين خطوة اختيارية وهى عمل ماسك تفتيح وافضل شئ هو الطين المغربى نتايجه طبعا معروفة
فى التفتيح والتنعيم ,الربع كيلو من عند العطار بخمسة جنيه ,هاتى شوية بطبق واعجنية بكوباية
زبادى وشوية ماء ورد او اعجنيه بلبن مع حتة كريم مرطب او فازلين عشان ماينشفش
ويتفرد عالجسم كويس, ودة ممكن تستعمليه على وشك انما السنفرة لا جامدة عليها, وبعدين سيبيه
على اد ماتقدرى المفروض لحد ماينشف وليكن تلت ساعة مثلا ,طبعا شئ ممل تقعدى مستنية
كدة فاغسلى شعرك مثلا ساعتها ,وبعدين افركى الطين مش حقولك عالفرق اللى حتحسيه بجد قبل
وبعد ,وبعدين اشطفى جسمك مش حقولك شاور جيل ولا معرفش ايه ,صابونة عادية يستحسن صابونة
طبية لايف بوى مثلا مع صابونة كبريت رخيصة وحلوة جدا لانها مطهرة بتقتل المكروبات وبتفتح
الجسم مع الاستمرار و بتطفى الحبوب لو عندك بس رغيها جامد و افركى بيها وخاصة
مناطق ثنايا الجلد , وبس كده.
طبعا لو واظبتى على السنفرة مرة اسبوعيا وماسك الطين مرتين او حتى مرة بالشهر ,
ان شاء الله حتحسى بالفرق وحتتعودى وحتتشجعى لان نتايجها حلوة جدا وبتبان من اول مرة
وبمكونات بسيطة سهلة متوافرة ومش مكلفة خالص.
لو عجبكم الموضوع حبقى اكتبلكم ان شاء الله تجاربى اللى حسيت انها جابت نتايج سواء
فى البشرة او الشعر
احبكم فى الله وبطلب منكم الدعاء ان ربنا يفرجها على وعلى اهلى وعلى المسلمين اجمعين
عاجلا غير اجل
- تمرين اشان جسم يكن جامد
- صنفرة كبريت الغور للجسم
