يابوي ليتك حي وتشوف حالي
تشوف وش هو صار من بعد فرقاك
صار الوطن بعدك من الناس خالي
صار… ( الوطن غربه ) بعد مافقدناك
يابوي انا بعدك سهير الليالي
مقهور من دنياي منا…. ومناك !
حدتني الدنيا وانا راس مالي
اني … عزيز النفس . مثلك وشرواك
مافيه شي في حياتي صفالي
حتى . الورود . ان جيتها صارت اشواك
اطيح واحمولي عليه اثقالي
واتخيلك مديت لي كف , يمناك
بعدك ولامره ترى ارتاح بالي
اصفق على كفي ندم واتحراك
من ضيقتي ياكم اصدق خيالي
واقوم ادور عنك واقول ب القاك
اضيع بالعالم وهمي سؤالي ؟
هو انت ؟ وينك ؟ ليه ماعاد شفناك ؟
ادري لو انك حي ياعز غالي
يمديك.. تفزع قبل.. ماجيك وانخاك !!
ويلاه , ياحالي وماهو جرالي
ويلاه , ياقلب تعذب في طرياك
ويلاه , يابويه من اول وتالي
لا…… والله.. اول.. كان.. ينجيني ادعاك
واليوم من بعدك وش اللي بقالي
غير اني ادعي ربي يغفر خطاياك
