اخواتي الحبيبات ان شا الله رح اوريكم طريقه سهله لعمل الملفوف ان شا الله تعجبكم..
الحشوه لو عملتيها ب هالطريقه رح تسهل عليكي كتير عملية اللف و رح تعطيكي نتيجه
رائعه و الرز داخل الملفوفه ما رح يكون مخبص و كانه رز مسلوق بل رح
يكون كل حبه ب حبتها..
بالاضافه الى اني عملته في قدر الضغط اختصارا للوقت..
احب انوه الى انه في اخت ذكرت عن طريقه بديله ل سلق الملفوف باستخدام الميكرويف
و انا شخصيا جربتها لكنها ما ضبطت معي و اضطريت ارجع اسلقه تاني..
و فيه اخت تانيه جزاها الله كل خير ذكرت عن تفريز الملفوف بدل السلق و
هاي اول مره اجرب و الحمد لله كانت تجربه ناجحه و اعتمدتها خصوصا اني من
محبي الملفوف و بعمله باستمرار..
نبدا باسم الله الرحمن الرحيم..
فرزت الملفوفه و كان لها عدت ايام و طلعتها من الفريزر و تركتها تسيح تماما
، و هون شكلها بعد الفريزر..
بدون سلق و لا غيره رح تكون الورقه طريه و تتحكمي فيها زي ما بدك
، قطعتها و شلت العصب منها و كل ورقه عملت لي 4 قطع..
نتكلم الان عن الحشوه..
ننقع الرز المصري بعد غسله بالماء و نصفيه بعد مدة النقع الكافيه..
في تاوه نضع قطعة زبده او زيت حسب ما تحبي بس انا افضل الزبده للرز
، و نحميه و نقلب الرز الى ان تتشرب كل حبه نصيبها من الدهن و
لما يصير الرز متل الصوره نضيف عليه حبه كبيره طماطم مقشره و مقطعه و ممكن
تزيدي لو تحبي الطماطم ظاهر فيها..
نقلب البندوره مع الرز الى ان يتشربها و يجف ماءها و نضيف الملح + فلفل
اسود + بهار + نصف مكعب ماجي مفتت + كمون + توم مهروس (انا استخدمت
توم مجفف ) + عصير نص ليمون..
نكون مجهزين لحم مفروم و بقدونس مفروم و شبت و كزبره خضرا مفرومين (استخدمت البقدونس
فقط لان زوجي ما يرغب الكزبره و لا الشبت )
نقلب جميع المكونات مع بعض و هون الحشوه صارت جاهزه و لاحظو كيف ما فيها
و لا نقطة سائل و هذا اللي يخلي الحشوه سهله في الاستخدام..
اما عملية اللف ف متل الصوره و لاحظي كيف نثني طرف الورقه اللين من جهه
وحده فقط..
هون الكميه جهزت عندي..
و هون رصيتها في قدر الضغط ، انا ما احب اضيف لا بصل و لا
بطاطا و لا بندوره معه ، بس كل وحده و ما ترغب ، ممكن تحطي
في القاع شرايح بندوره او بصل و لا انصح بالبطاطا في القاع لانها رح تتشرب
كل النكهه..
ممكن كمان تحطي شحم او ريش خروف ، و رح تشوفي كمان شوي اني نسيت
احطها في القاع و حطيت ع الوجه لانها بتعطي نكهه غير شكل..
و هاي كمان صوره ~ اخدتو بالكم اني اشتغلت في الصالون مو في المطبخ ههههههه
ارضية الصوره غير عن كل مره !!
حضري كوب و نص ماء مغلي و اعصري عليه نص ليمونه + ملح + توم
مهروس (استخدمت المجفف) + كمون و صبيه على الملفوف مع مراعات ان الماء يكون بيغلي،
بحيث ارتفاعه يصل الى مستوى الطبقه ما قبل الاخيره فقط ، لان الملفوف مع التفريز
متشرب ماء و رطب و الرز متشرب البندوره و الليمون ف رح تلاحظي انه ما
بيحتاج كتير ماء..
اغلقي قدر الضغط .. و ولعي عليه الى ان يصفر و هدي النار عليه و
احسبي له نصف ساعه (ملفوفتي وزنها كيلو و نص )لو كانت الكميه اكبر زيدي المده
شوي..
و هون شكله اول ما طفيت عليه..
- الرز مخبص في الملفوف