الملكه عصمة الدين اتلقبت بام خليل. اسمها الشعبي و المعروف شجرة الدر ( اتوفت في
القاهرة سنة 1257 )، ارملة السلطان الايوبي الصالح نجم الدين ايوب اللي لعبت دور كبير
و حاسم بعد وفاته والحرب ضد الحمله الصليبيه السابعه بتاعة لويس التاسع ملك فرنسا دايره
في مصر ( 1249 – 1250 ). بقت سلطانه على مصر في 2 مايو سنة
1250، وانتهى بكده عصر الدوله الايوبيه في مصر وابتدى عصر الدوله المملوكيه. بعد ما حكمت
مصر كسلطانه 80 يوم اضطرت، تحت ضغوط الخليفه العباسى فى بغداد والايوبيين في الشام، انها
تتنازل ل عز الدين ايبك عن العرش وتتجوزه فحكمت معاه مصر لغاية ما اتوفوا سنة
1257. وصفها المؤرخين بانها كات ست جميله و ذكيه وعندها فضيله. بيعتبرها مؤرخين اول سلاطين
الدوله المملوكيه فى مصر
اصلها
الحمله الصليبيه السابعه 1249
قوات الحمله الصليبيه السابعه نزلت بر دمياط.
شجر الدر كانت جاريه من اصل تركى او جايز ارمنلى اشتراها الصالح ايوب قبل ما
يبقى سلطان ورافقته في فتره اعتقاله في الكرك سنة 1239 مع مملوك ليه اسمه ركن
الدين بيبرس ( مش ركن الدين بيبرس السلطان المشهور الملقب بالظاهر بيبرس ) وخلفت منه
ولد اسمه خليل اتلقب بالملك المنصور. وبعد ما اتخلص الصالح من الحبس راحت معاه مصر
و اتجوزته ، وبعد ما اتسلطن (1240) بقت بتنوب عنه في الحكم لما يكون بره
مصر.
في ابريل سنة 1249 والصالح ايوب في الشام بيحارب الملوك الايوبيين اللي بينافسوه على الحكم
وصلته اخبار ان ملك فرنسا لويس التاسع (Louis IX) – اللي اتعمل قديس بعد وفاته
– في قبرص و في طريقه لمصر على راس حمله صليبيه كبيره عشان يغزوها، فرجع
على مصر عيان جدا و قعد في اشموم طناح جنب دمياط على البر الشرقي من
الفرع الرئيسي للنيل عشان يجهز الدفاعات لو هجم الصليبيين. و فعلا في يونيو 1249 نزل
عساكر وفرسان الحمله الصليبيه السابعه من المراكب على بر دمياط و نصبوا خيمه حمرا للملك
لويس و انسحب العربان اللي كان حطهم الصالح في دمياط عشان يدافعوا عنها فاحتلها الصليبيين
بسهوله وهي خاويه من سكانها اللي سابوها بعد ما شافوا العربان هربوا ، فزعل الملك
الصالح واعدم كام واحد من العربان بسبب جبنهم و خروجهم عن اوامره ، و اتنقل
و هو عيان في النزع الاخير على نقاله لمكان اامن في المنصورة. وفي 23 نوفمبر
1249 اتوفى الملك الصالح بعد ما حكم مصر عشر سنين و في لحظه حرجه جدا
من تاريخها.
شجر الدر استدعت قائد الجيش المصري ” الامير فخر الدين يوسف ” و رئيس القصر
السلطاني ” الطواشي جمال الدين محسن ” وقالت لهم ان الملك الصالح اتوفى و ان
مصر دلوقتي في موقف صعب من غير حاكم وفيه غزو خارجي متجمع في دمياط، فاتفق
التلاته على انهم يخفوا الخبر لحسن معنويات الناس والعساكر تتاثر و يتشجع الصليبيين . و
في السر من غير ما حد يدري نقلت شجر الدر جثمان الملك الصالح في مركب
على القاهرة و حطته في قلعة جزيرة الروضه. و مع ان الصالح ايوب قبل ما
يموت ما عملش وصيه بمين يمسك الحكم بعده، شجر الدر بعتت زعيم المماليك البحريه ”
فارس الدين اقطاى الجمدار ” على حصن كيفا عشان يستدعي ” توران شاه ” ابن
الصالح ايوب عشان يجي مصر يمسك الحكم بدل ابوه المتوفي.
الصالح ايوب قبل ما يتوفى كان مضى اوراق على بياض لشجر الدر عشان تستعملها لو
مات، فبقت شجر الدر والامير فخر الدين يصدروا اوامر سلطانيه على الاوراق دي وقالوا ان
السلطان عيان و ما يقدرش يقابل حد وكانوا بيدخلوا اكل في القوده اللي المفروض انه
راقد فيها عشان ما يخلوش حد يشك. وبعدين راحوا مصدرين قرار سلطاني بتجديد العهد للسلطان
الصالح ايوب و تنصيب ابنه توران شاه ولي لعهد السلطنه المصريه و حلفوا الامرا و
العساكر.
انتصار مصر على الحمله الصليبيه السابعه
طلع رجالة شجر الدر على الصليبيين الغزاه.
لويس التاسع ملك فرنسا اتاسر في فارسكور.
اخبار وفاة السلطان الصالح ايوب وصلت الصليبيين في دمياط بطريقه ما، و في نفس الوقت
وصلت دمياط امدادات مع ” الفونس دو بويتي ” (Alphonse de Poitiers) اخو الملك لويس،
فاتشجع الصليبيين و قرروا الخروج من دمياط والطلوع ع القاهره. وقدرت قوات من الفرسان الصليبيين
بقيادة روبرت دارتوا (Robert d’Artois ) اخو الملك لويس من اجتياز قناة اشموم على مخاضه
دلهم عليها واحد من العربان فهجموا فجاءة على المعسكر المصري في جديله على بعد حوالي
3 كيلومتر من المنصوره. فاتقتل الامير فخر الدين يوسف و هو طالع من الحمام على
صوت الضجه والصريخ و هربت العساكر اللي بغتها الهجوم الغير متوقع و راحوا على المنصوره.
الامير ركن الدين بيبرس عرض على شجر الدر، الحاكمه الفعليه لمصر في اللحظه دي، خطة
عملها يدخل بيها الفرسان الصليبيين المندفعين على المنصوره في مصيده فوافقت شجر الدر على الخطه،
و جمع بيبرس و فارس الدين اقطاي اللي بقى القائد العام للجيوش المصريه، العساكر المنسحبين
من جديله و نظم صفوفهم جوه المنصوره وطلب منهم ومن السكان التزام السكون التام بحيث
ان الصليبيين المهاجمين يفتكروا ان المدينه خاويه زي ما حصل في دمياط. و فعلا بلع
الفرسان الصليبيين الطعم و اندفعوا جوه المنصوره و جروا على القصر السلطاني عشان يحتلوه، فطلع
عليهم المماليك البحريه و المماليك الجمداريه فجاءه و هما بيصرخوا زي الرعد و هاجموهم من
كل ناحيه بالسيوف و السهام وقتلوا فيهم وطلع سكان المنصوره و المتطوعين و هما لابسين
طاسات نحاس ابيض بدل خوذات العساكر و ضربوهم بكل اللي طالته ايديهم.
المماليك حاصروا القوات الصليبيه المهاجمه وسدوا الشوارع و الحواري و بقم الصليبيين مش قادرين يهربوا
و ما بقاش قدامهم الا القتل على الارض او يرموا نفسهم في مية النيل ويغرقوا
فيه. واستخبى ” روبرت دارتوا ” اخو لويس جوه بيت، بس الناس لقته وقتلته. و
انتهت المعركه بهزيمة الصليبيين هزيمة منكره في حواري المنصوره و اتقتل منهم عدد كبير لدرجة
ان من فرسان المعبد ما نجاش الا واحد او اتنين.
ده كان اول ظهور للمماليك البحريه جوه مصر كمقاتلين بيدافعوا عنها، و في اللحظه دي
تاريخ مصر و المنطقه اللى حواليها كان بيتشكل عن طريق شجر الدر ورجاله حا يدخلوا
تاريخ مصر و العالم زي الظاهر بيبرس و عز الدين ايبك و قلاوون الالفي و
غيرهم.
في فبراير 1250 و صل توران شاه مصر واتنفست شجر الدر الصعداء بعد الدور التاريخي
الكبير اللي لعبته و قدرت تحمي مصر بحكمه و نباهه متناهيه، و اعلنت وفاة جوزها
السلطان الصلاح ايوب رسميا. و راح السلطان الجديد توران شاه طوالي على المنصوره و في
يوم 5 ابريل 1250 هرب الصليبيين على فارسكور و انهزموا هناك هزيمه ساحقه و اتاسر
الملك لويس و اتربط بالسلاسل مع امراءه و نبلاءه.
الصراع مع توران شاه
توران شاه اغتيل سنة 1250.
بهزيمة الحمله الصليبيه السابعه على مصر و اسر الملك لويس التاسع بدات النزاعات و الخلافات
تظهر بين توران شاه من ناحيه و شجر الدر والمماليك من ناحيه. فتوران شاه كان
فاهم انه مش ممكن حايقدر يحكم بجد طالما شجر الدر موجوده ومعاها امرا ومماليك ابوه،
فبدا يقبض على موظفين قدام ويبدلهم بناس جم معاه من حصن كيفا بما في ذلك
نايب السلطنه حسام الدين اللي بدله بجمال الدين اكوش. و بعدين راح باعت جواب لشجر
الدر اللي كات ساعتها في القدس [17] يهددها و يطالبها فيه بتسليمه فلوس ابوه و
مجوهراته. شجر الدر غضبت من اسلوب تعامل توران شاه معاها مع انها هي اللي حفظت
سلطنه ابوه المتوفي و هي اللي جابته مصر من حصن كيفا و نصبته سلطان، فراحت
باعته للمماليك تقولهم عن تهديد توران شاه و معاملته ليها. لما عرف المماليك بجحود توران
شاه زعلوا جدا خاصة فارس الدين اقطاي اللي كان اصلا متضايق من توران شاه لانه
كان بيسكر و يقعد يشتم في الامرا المماليك و يهددهم بالقتل. في 2 مايو 1250
اغتال المماليك توران شاه في فارسكور و بكده انتهى حكم الايوبيه و انطوت صفحتهم في
مصر.
سلطنة شجر الدر
Mam knight 1.jpg
بعد ما اغتيل توران شاه اجتمع الامرا المماليك في دهليز السلطان في فارسكور وقرروا تنصيب
شجر الدر سلطانه على مصر وعينوا الامير عز الدين ايبك اتابك على الجيش. و بعتوا
لشجر الدر في قلعة الجبل في القاهره يقولولها على القرار اللي اخدوه فوافقت.
اتنصبت شجر الدر سلطانه على مصر بلقب ” الملكه عصمة الدين ام خليل شجر الدر
” و اخدت القاب تانيه زي ” والدة الملك المنصور خليل امير المؤمنين ” و
” ام الملك خليل ” و ” صاحبة الملك الصالح “. و اتصكت لها الفلوس
بالقاب ” والدة خليل ” و كات بتمضي على المستندات السلطانيه بالاسم ده. و كلها
القاب حاولت تاخد بيها شرعيه للحكم بوصفها مرات السلطان و ام ابن السلطان والاتنين كانوا
متوفيين.
بعد ما لويس التاسع الماسور دفع جزء من الديه اللي اتحطت عليه بسبب الخساير اللي
سببها لمصر و وعد بانه حا يدفع الباقي بعدين سمحت له شجر الدر بمغادرة مصر
و انقذت حياته فسلم دمياط و سافر على عكا يوم 8 مايو 1250 ومعاه اخواته
و 12.000 اسير كان منهم عدد اتاسر في معارك قديمه.
الصراع مع الايوبيه وموقف الخليفه العباسى
اخبار اغتيال توران شاه وتنصيب شجر الدر سلطانه على مصر وصلت الشام. القاهره طلبت من
الامرا الايوبيين في سوريا انهم يعترفوا بسلطة شجر الدر على الشام و طاعتها لكنهم رفضوا
و اتمرد نايب السلطنه في سوريا على الامر السلطاني الصادر من القاهره. و راحوا الامرا
الايوبيين مسلمين دمشق للملك الايوبي الناصر يوسف ملك حلب فرد عليهم المماليك المصريه بالقبض على
امرائهم المواليين ليهم في القاهره. و كمان الخليفه العباسى المستعصم بالله بتاع بغداد [18] مارضاش
يعترف بسلطة شجر الدر و بعت لمصر جواب يقولوهم فيه ان لو الرجاله انعدمت عندهم
يقولوا فيبعتلهم رجاله. مع ان شجر الدر غلبت الصليبيين و حمت مصر وهو ما قدرش
مع رجالته دول يحمي بغداد اللي دمرها المغول بعدها بكام سنه ، و قبضوا عليه
و على رجالته و ركلوه برجليهم لغاية ما مات مع انه كان بيبعتلهم هدايا و
بيديهم فلوس [19] عن النقطه دى بيقول الدكتور حسين فوزى : ” تندر الخليفة العباسى
بالمصريين اذ ولوا عليهم امراة، و ابدى استعداده لايفاد رجال من بغداد، اذا كانت الرجال
قد عزت فى الديار المصرية. و يشاء القدر ان يرد سخرية هذا الخليفة الى نحره،
بعد مضى سنوات قلائل، عندما انقض على دولته ملك المغول هولاكو، يدمر ملكه و حاضرة
ملكه، فلا يجد رجالا يدفعون عنها الكارثة. و اذا مصر تجد فى رجالها، و فى
المماليك الذين ولوا عليهم السيدة ام خليل، جيشا قديرا على صد المغول و ضربهم فى
عين جالوت. ” [20]. و هو الخليفه اللى قال عنه المؤرخ ابن ايبك الدواداري انه
” كان فيه هوج، وطيش، وظلم، مع بله، وضعف، وانقياد الى اصحاب السخف. يلعب بطيور
الحمام، ويركب الحمير المصرية الفرء ” [21]
لكن رفض الخليفه العباسي الاعتراف بسلطة شجر الدر كان مشكله بالنسبه للماليك المصريه لان العاده
في عصر الايوبيه ( السنه ) اللى حكموا بعد الفاطميين ( الشيعه ) ان السلطنة
ما بيعترفش بيها ومابتبقاش ليها شرعيه من غير تقليد الخليفه ( السنى ) للسلطان الجديد.
ففكر المماليك يعملوا ايه لغاية ما قرروا ان احسن حاجه ان شجر الدر تتجوز الاتابك
عز الدين ايبك و تتنازل له عن الحكم. و ده اللي عملوه، و اتجوزت شجر
الدر ايبك واتنازلت له عن الحكم بعد ما حكمت 80 يوم.
مع ان فترة حكم شجر الدر كات قصيره لكن حصلت فيها حاجتين من اهم الحوادث
التاريخيه، و هي هزيمة الحمله الصليبيه السابعه اللي بهزيمتها انتهت فترة الحملات الصليبيه الكبيره على
جنوب حوض البحر المتوسط و مهدت لطرد الصليبيين من ممالكهم في الشام. والحاجه التانيه هو
تلاشي الدوله الايوبيه من مصر و بزوغ نجم المماليك اللي بقم سلاطين وبقت لهم دوله
كبيره منظمه استمرت لعقود من الزمان قدروا فيها يحموا مصر و البلاد اللي حواليها من
الصليبيين و المغول. الحاجتين التانيين المهمين هو ان واحده ست قعدت على عرش مصر و
دى حاجه ما حصلتش من سنة 30 ق.م بعد موت الملكه كليوباترا السابعه ، و
تاسيس سلطنه الحكم فيها ما بيقومش على وراثة العرش زى ما كان الوضع وقتها فى
كل الممالك.
في فترة حكم ايبك – واللي كات شجر الدر بتحكم فيها معاه – استمر الصراع
مع الايوبيين في الشام. و انهزم الايوبيين الشاميه في كل معاركهم العسكريه ضد مصر اللي
كات قدراتها و امكانياتها العسكريه و الاقتصاديه بتفوق قدراتهم بمراحل. و حاول الناصر يوسف ملك
سوريا الدخول في حلف مع الصليبيين ضد مصر و فشل، ولما ظهر المغول نافقهم و
حاول يتحالف معاهم ضد مصر لغاية ما دخلوا سوريا و احتلوا دمشق فهرب على مصر
لكن السلطان قطز منع دخوله مصر بسبب خيانته فقعد تايه على حدود مصر لغاية ما
المغول قبضوا عليه و بعتوه لهولاكو فقتله بعد انتصار مصر على المغول في معركة عين
جالوت لانه ما قدمش العون الكافي للمغول في حربهم ضد مصر.
شجر الدر و ايبك نقلوا جثمان الصالح ايوب من قلعة جزيرة الروضه، اللي حطته فيها
شجر الدر في السر وقت الحملة الصليبية السابعه، لتربته في القبه اللي بنتها له شجر
الدر جنب المدارس الصالحيه في منطقة بين القصرين في القاهره. و اتعملت له مراسم دفن
و اتصلى عليه بمشاركة ايبك و الملك الاشرف موسى و المماليك البحريه. و اتعمله عزا
لمدة تلات تيام.
النهايه
ضريح شجر الدر فى القاهره.
بحلول سنة 1257 المشاكل والشكوك المتبادله بين شجر الدر و ايبك زادت حدتها. ايبك كان
سلطان بيدور على الامان و استقرار حكمه، و مراته شجر الدر كات سلطانه وست باراده
صلبه قدرت تخلي بلد مالهاش حاكم تفضل متماسكه في ظروف غزو خارجي مرعب. شجر الدر
كات عايزه تحكم لوحدها وكات ساعات بتخفي اسرار الدوله عن ايبك، و فوق كده كات
بتتحكم فيه و بتمنعه من انه يزور مراته التانيه ام المنصور علي وبتطالبه طول الوقت
بانه يطلقها. لكن بدل ماايبك يستجيب لمطلبها بتطليق مراته التانيه جهز نفسه عشان يتجوز ست
تالته، و دي كات بنت بدر الدين لؤلؤ حاكم الموصل، وكان عايز يتجوزها عشان يبقى
ابوها حليف ليه ضد ايوبيين الشام. ابو العروسه بدر الدين لؤلؤ قال لايبك ان شجر
الدر بعتت جواب للناصر يوسف و حذره منها. شجر الدر شكت في نية ايبك ناحيتها
و حست انه ممكن يقتلها، و اعتبرته جاحد لافضالها عليه. وكات النتيجه انها دبرت خطه
لقتله فدخل عليه الخدامين و هو بيستحمى في قلعة الجبل و خنقوه لغاية ما مات.
و تاني يوم الصبح قالت انه مات فجاءه بالليل. قصة شجر الدر ما دخلتش دماغ
قطز نايب السلطنه و المماليك المعزيه و حاولوا يقتلوها لكن المماليك الصالحيه اتدخلوا و حموها
و قعدوها في البرج الاحمر في القلعه. و اعترف الخدامين تحت التعذيب بالمؤامره. وبعد كام
يوم اتعثر على جثتها مرميه بره القلعه بعد ما ضربوها جواري المنصور علي وامه لغاية
ما ماتت. و اعدموا الخدامين اللي اشتركوا في قتل ايبك.
اتدفنت شجر الدر في مقبرة بتعتبر تحفه معماريه و فنيه فريده مرسوم على حيطانها شجرة
الحياه بالموزاييك، على مسافه قريبه من جامع احمد بن طولون في القاهره.
بيقول المؤرخ ابن اياس عن شجر الدر : ” كانت ذات عقل و حزم، كاتبه
قارئه، عارفه بامور المملكه ” و ” نالت من الدنيا ما لم تنله امراه قبلها
و لا بعدها” [22].
شجر الدر في الفولكلور المصرى
الحكاواتيه حكو للناس عن شجرة الدر.
شجر الدر في الفولكلور اسمها شجرة الدر (اسمها الشعبي) . و هي شخصيه من شخصيات
سيرة الظاهر بيبرس. السيره الشعبيه دي اللي كان بيحكيها الحكاوتيه على القهاوي في مصر لغاية
بدايات القرن العشرين بتبين مدى حب المصريين للسلطان الظاهر بيبرس و شجرة الدر. و بتحكي
السيره اللي معظمها خيال ان فاطمه شجرة الدر كات بنت خليفه اسمه المقتدر كان بيحكم
في بغداد لغاية ما المغول هجموا على مملكته و دمروها. وان اسمها شجرة الدر سببه
ان ابوها اللي كان بيحبها جدا اهداها فستان معمول من اللولي ( الدر ) فلما
لبسته بقت زي ما تكون شجرة در. ولما طلبت منه انه يعملها ملكه على مصر
اداها تقليد بحكم مصر. فلما راحت على مصر لقت الصالح ايوب بيحكمها فاتجوزها عشان يفضل
في الحكم معاها. ولما جه بيبرس مصر و دخل القلعه حبته زي ابنها. ايبك التركماني
طالع في السيرة راجل شرير من الموصل جه مصر عشان ينزع حكمها من شجرة الدر
و جوزها الصالح. بعد الصالح ما اتوفى اتجوزت ايبك لكن الصالح ايوب جالها في المنام
و امرها بانها تقتله. فلما قامت من النوم جابت السيف و قتلته. و لما دخل
ابنه على القوده ولقاها قتلته خافت و جريت فجري وراها لغاية ما وقعت من القلعه
و ماتت [23].
عملات شجر الدر
عملة دينار, من مجموعة المتحف البريطانى, القاهره 1250
اسماء و القاب شجر الدر اتنقشت على عملاتها كده : ” المستعصمة الصالحية ملكة المسلمين
والدة الملك المنصور خليل امير المؤمنين “. و اتنقش على ضهر العملات اسم الخليفه العباسي
: ” عبد الله بن المستنصر بالله ” [24].
