عيون نعسانه

بلا مقدمات او مواعيد مسبقة (داهمنا) – ونعني المعنى الحقيقي للكلمة – مكتب الدكتور كمال
هاشم مستشار طب وجراحة العيون الكائن بمركز السودان للعيون.. وجهنا جهاز التسجيل ناحية كرسيه الدوار
ودعمنا اسئلتنا بالورقة والكاميرا.. حاصرنا الرجل الذي لم يجد بدا غير الاستسلام للحوار الذي حمل
شكل وطريقة (الونسة) زاد من تجذرها (صحن البلح) الاصيل وقوارير المياه والشاي السادة والذي امن
د. كمال على ان (بلحه) قادم للتو من منبعه ما يعني انه مازال طازجا وب(شرايتو)
كما يقول المثل القادم من عند اهلي في الشمالية… لم نمنح د. كمال فرصة للهروب
وحاصرناه بالسؤال الاول
لماذا طب العيون؟
– والله رغبتي الاساسية كنت عاوز ادرس هندسة معمارية او فنون والطب دا رغبة الاسرة
وقريتو وبعد ما اكملت مدة الدراسة في كلية طب قسم العين عملت في مناطق النازحين
واللاجئين واستهداف العمل داخل المجموعات المتاثرة بالكوارث وما كنت ناوي ارجع اتخصص في اي حاجة
لكن عندي زميل وصديق قال لي (الطب ذي الجيش) لازم تتخصص وتترقى فيهو واعتقدت في
ذلك الوقت ان العيون تخصص خفيف لكن كنت غلطان تماما والحمد لله اكملت التخصص واكتشفت
انو العيون فيها مجال لخدمة المجتمع لان المكفوفين كتار جدا لمن اتخصصت كان هناك (600
الف كفيف) الان تناقص للنصف مع تقدم التقنية وتخصص العيون.
٭ بتشوف شنو جوا العيون يا دكتور؟
– زمان كنا نغش اصحابنا غير الاطباء نقول ليهم بنشوف جوا العيون الحاجات الشافها المريض
الشهر الفات فكانوا يخافوا ان نرى ما فعلوه الشهر الماضي.. اول ما يلفت نظري (العيون)
في اي زول ولو ما عارفني دكتور عيون بيقولوا عيني قوية…
العيون من الدلائل على عظمة الخالق فالتعبير والتواصل بالعيون اكبر من التواصل بالكلام اذ تعجز
الكلمات عن طرح التواصل وتستطيع العيون ذلك كثير من الناس لا يابهون لتخصص طب العيون
ومنهم (حبوبتي) لمن قالوا ليها كمال بقى دكتور عيون قالت ليهم (ليه خلى الطب)؟
بحكم تعاملي الكثير مع العيون بقيت افهم تعبيرات العيون بصورة واضحة رغم ان عيون السودانيين
تخفي ماوراءها لان العيون العسلية تمنعنا نشوف التفاعل بتاع انسان العين وهو ما يعبر عن
التفاعل والمشاعر فالناس البشرتهم فاتحة تعبير عيونهم واضح ففي افلام الجاسوسية يلبسوا نظارات سوداء لاخفاء
الانفعالات لانها تكشف دواخلهم وحتى في حالات التفاوض مع الخصم.
٭ اكثر عين عندها جاذبية؟
– العين الحوراء هي الجميلة دائما.. رموش طويلة ملتوية الى اعلى كذلك العيون الكبيرة لكن
من ناحية طبية العيون الكبيرة فيها مشكلات ممكن يكون تعاني من قصر نظر وممكن يكون
ارتفاع في الغدة الدرقية.
٭ قلت شعر في عيون عجبتك؟
– استمتع بشعر العيون كذلك الاغاني فمعظم الغنا السوداني فيهو سيرة العيون لم اكتب الشعر
ولكني ارسم بعمق واعشق الرسم لا احفظ الشعر رغم المتعة التي اجدها فيه.
٭ ماذا في عيون الاطفال؟
– اجمل ما فيها البراءة والاجمل انها متوثبة وباحثة عن المعرفة فاجمل شئ الشغف في
المعرفة وما اجمل الصفاء والجمال والصحة فيها..
٭ ماذا تعني صحة العين؟
– صحة العين ان يكون بياضها صافي وجزء السواد يبرق تماما يلمع فهي عين لا
تخشى الضوء ليس فيها حول اي متوازنة وغير دامعة ولا تعجبني العين التي بها مشكلة
صحية وانا لا اقدر اعالجها مثل العين التي لا ترى الضوء اصلا والاخرى (الضامرة)…
في الثقافة السودانية مثلا العين التي بها (وقاحة) هذه عين لاتعجبني وهي غير مريحة كذلك
العين الكاذبة.
٭ ما هو ارتباط العين بالمناسبات؟
– نعم العيون تعكس المناسبة ففي الفرح نجد العيون فرحة ومبتهجة وفي الاحزان نجدها حزينة
فالعين اذا تعكس الحالات الان نحن نشفق على العيون من الالوان التي نجدها داخل وخارج
العين وهذه لاتجمل العين لان الله خلق العين على حالة طبيعية جميلة وانا اشفق على
العيون التي تضاف لها المواد الصناعية لانها تؤذيها فالعدسات الملونة تسبب الكثير من المشكلات وما
يؤرقني الان ان بعض الفتيات (يستلفن) العدسات من بعضهن البعض وهذا قطعا يؤدي لانتقال الامراض.

٭ ما هي العلاقة بين شخصية الانسان وعيونو؟
– نعم العين تعكس شخصية الانسان والزول لا يمكن ان يخفي حقيقة شخصيتو فالعين لا
تكذب ابدا ونحن كاطباء عيون احسن من جهاز كشف الكذب لمن نشوف العيون ونعرف انها
صادقة ام كاذبة.
٭ العين في الثقافة السودانية؟
– العين شئ محوري فمثلا نقول عين الشمس وعين الحقيقة وعين الصواب وعين الموية اذا
هنالك علاقة بين العين والمحور..
٭ العيون وفنون الرسم؟
– اهتم وامارس الرسم وهو هواية عندي ولا انكر اني اركز على العيون والرسم محاولة
للتعبير بطريقة مختلفة عن طريق الالوان والاشكال لكن الناس البشوفو الرسومات واللوحات بقولوا العيون حاضرة
تماما.
٭ شنو تفسيرك للقول او المثل (فلان شال ايدو طبظ عينو)؟
– دي طبعا حاجة حارة جدا جدا وللاسف طبزة العين للزول باصبعو لا تنتهي عند
الالم الاول فهي تعمل قرحة والقرحة تتفاقم وتؤدي لضياع العين لذلك يجب ان نكون حريصين
ما نطبز عيونا وان كان احيانا تاتي غير متعمدة او مقصودة والمثل متداول طبعا في
الحياة اليومية.
٭ الغنا السوداني وارتباطو بالعيون؟
– دا عاوز تحليل ودراسة وكنت اتمنى يكون عندي وقت عشان اشوف الرابط شنو فانا
لاحظت ان معظم الغنا السوداني فيهو سيرة العيون.
ودعنا طبيب العيون د. كمال هاشم وللحديث بقية اذ لم نخرج من مكتبه الا بعد
ان طرق احدهم الباب لتذكير الدكتور بمواعيد اجراء عملية لاحدهم بعد نصف ساعة ما يعني
ان ننهي حوارنا ليكمل الدكتور استعداده للدخول لغرفة العمليات.. تمنينا لمريضه الشفاء العاجل وخرجنا بعد
الاتفاق على موعد قريب جدا لجلسة ونسة اخرى حول معرضه الذي اقامه بمركز راشد دياب
للفنون لنكشف (الوجه الفني) للدكتور كمال هاشم لاحقا..

الصحافة

• اجمل ترنعسا نه
• كيف اخلي عيوني نعسانه